Diaranson atardi den sala di Conseho di Minister, a tuma luga presentacion di Three Rivers Real Estate, como desaroyadornan di e proyecto di hotel na San Nicolas. Esaki a sosode despues cu a firma na notario.

E reunion na Bestuurskantoor a tuma luga despues cu diaranson mainta a termina cu e proceso di traspaso di e tereno na e grupo Three Rivers, den cuadro di e proceso encamina via DIP, DOW y demas instancianan.

Recientemente Banco Central Aruba a otorga e permiso pa e desaroyadornan por importa e placa den cuadro di e ultimo fase cu tabata falta pa adkisicion di e tereno cu ta trata e “performance bond”. Ta trata di un suma promedio di 13 miyon, pa un proyecto di riba 200 miyon cu ta bay tuma luga.

Ademas, den e reunion cu gobierno e desaroyadornan a presenta ultimo diseñonan di e proyecto, cual a mustra anteriormente na DOW y a haya aprobacion pa nan. Mester bisa cu e diseño ta uno cu ta pas bon pa e area, segun e comunicado emiti pa Ministerio di Infrastructura. Aworaki conhuntamente cu e arkitectonan compañando e inversionistanan y desaroyadornan, lo bay cuminsa cu e proceso di entre otro introduccion na comunidad. Mas atardi, despues di e reunion cu a tuma luga den sala di Conseho di Minister, Three Rivers Real Estate a reuni tambe cu esunnan di San Nicolas Business Association.

Durante e presentacion, e desaroyadornan a intercambia di pensamento cu Prome Minister Evelyn Wever-Croes hunto cu colega Minister di Turismo Dangui Oduber, Minister di Labor Glenbert Croes y Minister di Husticia Andin Bikker.

Gabinete Wever–Croes ta sumamente orguyoso di e proyecto aki cu tin un trayecto sumamente largo, considerando cu ya pa decadanan a designa e area na San Nicolas como area pa desaroya. Sinembargo, den transcurso di añanan a wordo confronta cu diferente reto cu a impedi esaki.

A pesar di esaki, Gobierno actual, esta Gabinete Wever–Croes a base di e meta comun ta forma e totalidad pa por yega na e oportunidad aki pa logra un desaroyo pariba di nos isla. Un desaroyo cu henter San Nicolas lo beneficia di dje, pero cu lo tin efecto positivo, tambe pa economia di henter Aruba.