Den ultimo simannan por a nota un cantidad alarmante di accidentnan di auto cu ta involucra chauffeurnan di auto bao influencia di alcohol of droga. Mirando e situacion preocupante Thomas Ruiz, instructor di I Drive Aruba Driving School,Consultancy & Education Center a publica un video ariba su pagina di Facebook na unda e ta puntra na unda e campaña nacional di concientisaicon di uso di alcohol y droga den trafico a keda.

Manera pueblo por a tuma nota den noticia ultimo tempo tin hopi suceso cu ta envolve detencion di un persona cu ta corre auto bao di influencia di alcohol y hasta droga, den e caso aki el a referi na medicina, caminda hendenan ta hasta bira malo tras di stuur.

“Mi ta haya a yega tempo pa nos cuminsa cu un campaña,” Ruiz a remarca. El a indica cu e ta recorda tempo FADA tabata hopi activo cu e campaña Amigo Didi, dirigi specificamente na e automobislistanan cu ta consumi alcohol pa no subi tras di stuur, pero busca un Amigo Didi pa hibe su destino final.

El a enfatisa cu aworaki a yega tempo pacuminsa cu otro campaña similar mirando cu e cifranan cu tin actualmente y loke ta pasando actualmente den trafico, ta hopi preocupante.

Ruiz a splica cu el corre rond di Aruba busando algun tipo di poster, billboard of cualkier material di un campaña di concientisacion cu ta trata e tema di uso di alcohol y droga den trafico. Pero segun el a indica e no a wak ningun material asina ningun caminda.

El a trece pa dilanti algun idea cu lo por wordo usa pa cuminsa cu un campaña di conceintisacion. “Nos por pone por ehemplo na tur parada di bus of na tur e retondenan di un manera of otro. Bin cu un campaña catchy na unda nos por concientisa nos hendenan pa wak e consumo di alcohol excesivo di otro manera pa evita peliger,” el a resalta.

Ruiz a enfatisa cu a pesar cu FADA ta haciendo nan best a ariba plataformanan social y television cu nan campaña di concientisacion tcoante uso di alcohol y droga, mirando e cifranan di e cantidad di accidentenan cu ta envolve chaufferunan bao di influencia di alcohol of droga, e ta deduci cu un campaña no ta suficiente.

Na mesun momento el a subraya cu algo cu si el a ripara ta fuerte na Aruba ta e campaña cu tin pa consumo di alcohol. El a subraya cu e ta compronde cu comerciantenan ta haci nan propaganda pa nan bende nan producto y e no ta duna e comentario no pa kibra ningun comerciante pasobra e isla mester di comerciantenan pa economia por draai, pero for di su punto di bista mester por tin un balans entre e marketing di consumo di alcohol y un campaña di conceintisacion.

“Por ehemplo si bo ta corre please no bebe y si bo ta bebe no corre. Tene cuenta cu kico ta e peligernan. Mi ta kere e campaña aki mester ta un campaña visual. Un bon ehemplo cu nos por tuma ta di e campaña anti nicotina cu tabtin na Hulanda cu tabata hopi brutal y visual,” el a menciona.

El a indica cu e campaña aki tabatin su efectonan pasobra cifranan a mustra cu e consumo di nicotina a baha.

Ruiz a resalta cu hopi biaha hendenan cu ta consumi alcohol of froga y ta corre auto no ta conciente di kico ta e consecuencianan, kico nan por perde ora nan ta haya nan mes involucra den un accidente y nan ta intoxica. “Bo por cay cera, bo por perde trabao, bo por perde bo cas, bo por perde bo famia, bo por bay den divorcia. Tin hopi consecuencia social su tras y bo mester corda ora bo sali back, con bo ta cuminsa di nobo. Tur e cos nan ey mi ta kere mester ta un tiki mas brutal cu e campaña anterior,” el a subraya.

El a remarca cu por cuminsa na scolnan cu e campaña di concientisacion y por cuminsa cu campañanan visual ariba e careteranan di Aruba. El a señala cu tin hopi billboard cu por wordo usa pa concientisa e conductornan ariba e reisgonan di corre auto bao di influencia. “Mi sa e ta costa placa, pero bay conta cuanto e ta costando nos cu tur e accidentenan aki,” el a bisa.

El a agrega cu esaki tambe por tin efecto riba e economia di Aruba. El a splica cu Aruba su unico pilar economico ta e industria turistico y pa e motibo aki mes mester mantene Aruba su status di seguridad di trafico di tal manera cu e turistanan ta sinti nan mes sigur pa biaha bin Aruba pa pasa nan vakantie y haci uso di un vehiculo pa nan por conoce e isla miho, diverti nanmes di un manera of otro, sin expone nan mes na peliger.

“Una bes mas mi kier stress hopi riba esaki. Den mi opinion e ta hopi importante,” el a finalisa.

Den un entrevista cu Bon Dia Aruba den luna di mei, Ruis a toca e tema di cantidad di accidentnan di trafico. Tocante esaki, Ruiz a menciona cu nan a haya cifranan di dalmento na unda el a splica esun cu ta tuma luga mas frecuentemente ta accidente di cadena. Den esaki el a señala cu tin aproximadamente mas di 1.000 dalmento di auto pa luna y autoridadnan concerni mester traha pa minimalisa esaki.

Nan como rijschool mester conscientisa e hendenan riba nan comportamento den trafico, cu ora un chauffeur tin un vehiculo di motor, e no ta e doño di e trafico sino cu e ta parti di e trafico, cu tin cu comparti e caminda cu peaton, ciclista y otronan. “Pero manera nos ta wak aworaki nos tin hopi mas hende riba caminda.”