(NLTimes)—Lider di Forum voor Democratie (FvD) Thierry Baudet a yama e atake cu un boter di cerbes den un bar na Groningen un “atake politico” den su respuesta inicial. “Esaki no tabata djis un atake riba mi persona, pero tambe riba e posicion cu mi ta para p’e.”
Baudet tabata den un café na Groningen dialuna anochi pa un reunion electoral ora un mucha homber a atak’e. segun FvD, Baudet a ser asalta “riba su cabes cu un boter di cerbes y tambe a haya golpi na skina di su frenta banda di su wowo.” E partido a bisa cu un “ciruhano di trauma” a trata Baudet na UMCG.
Baudet a bisa diamars cu e ta sospecha cu e atake a bin for di e “banda Antifa”, pero e no tabatin prueba. “Ainda nos ta wardando pa un declaracion. Nos ta wardando pa mas informacion.” Polis a anuncia cu un mucha homber menor di edad for di Groningen a ser deteni pa e asalto.
E lider di FvD a sufri di un herida di cabes for di e atake. El a haya golpi net riba su wowo, y tras di su cabes. Baudet kier sigui cu e campaña, pero lo ser mas cauteloso, al menos pa awo. Baudet tambe a participa den e debate electoral di NOS diamars anochi. No ta claro ainda kico e consecuencianan lo ta pa e resultadonan di FvD. Dialuna anochi, el a cancela un evento na Zwolle pasobra e no tabata fisicamente “bon suficiente” pa participa den dje.
Politiconan a expresa nan decepcion cu e atake dialuna anochi. “Den un democracia, nos ta bringa otro cu palabra y e atake aki no por ser hustifica den ningun manera,” segun Frans Timmermans di GroenLinks-PvdA. E sentimento a ser comparti pa lider di VVD Dilan Yeşilgöz.
Geert Wilders (PVV) a yama e atake ambos “cobarde y dom”, mientras cu lider di NSC Pieter Omtzigt a sugeri cu Hulanda no a siña nada desde e asesinato di politico Pim Fortuyn na 2002.
