Theresa May a caba cu su mision di tres aña largo pa lidera salida di Reino Uni for di Union Europeo ayera, anunciando cu e lo retira como lider di partido conservador dia 7 di juni proximo, dunando inicio na un carera pa scoge un prome minister nobo kende lo purba di completa Brexit.
May lo keda como prome minister a cargo te ora scoge un lider nobo, un proceso cual e conservadonan tin meta pa completa pa fin di juli. E lider nobo di e partido lo bira prome minister sin necesidad di un eleccion general.
Segun palabranan di May, el a haci su miho esfuerso, pero no tabata suficiente. Su bos a kibra ora el a conta con ‘tabata e honor di mi bida pa tene mi trabou’. Tambe el a bisa cu e ta e di dos prome ministro femenino di e pais, y sigur no e ultimo. May a bira prome ministro di e pais na 2016, e mesun aña cu a tene votacion pa Brexit.
El a pasa mas cu un aña purbando di negosha un acuerdo cu UE, pero el a wordo rechasa tres biaha pa parlamento Britanico. Hopi conservador a wak May manera obstaculo pa sali di UE, esun cu keda na su luga lo confronta e mesun problema.
Gran Bretaña su fecha pa sali ta dia 31 di october, pero parlamento tin cu aproba e termino di divorcio. “Mi a negosha e termino di nos salida y un relacion cu pais bisiña pa proteha nos trabou, siguridad y union. Mi a haci tur cos pa convence parlamento, pero tristemente mi no a logra. Awo ta cla cu ta den miho interes pa e pais pa un prome ministro nobo haci e esfuerso. “Cu gran honor ma sirbi e pais cu mi ta stima.”
