(TheVerge) – Huawei tabata involucra den construccion di tecnologia pa camponan di labor y reeducacion, como tambe sistemanan di vigilancia den region Xinjiang na China, segun un presentacion di PowerPoint obteni y traduci pa The Washington Post. E reporte ta mustra algun di e maneranan cu trabao di e gigante tecnologico por tabata involucra den e persecucion contra minorianan etnico den e region.

The Washington Post ta bisa cu a obtene e PowerPoint for di un website publico di Huawei prome cu a elimina esakinan. Segun e reporte, e slides ta inclui detayenan riba participacion di Huawei hunto cu otro companianan pa crea varios sistema y tabatin metadata cu fecha desde 2014 te 2020 (cu fecha di derecho di autor lista entre 2016 y 2018).

Un di e slides ta papia tocante productonan di Huawei siendo ‘e fundacion di e plataforma di smart prison unifica’, cu referencia na labor pa fabrica y analisis di eficiencia di reeducacion. Segun The Post, algun di e prisonnan den cual Huawei a bisa ta usa su tecnologia ta na Xinjiang, un region principalmente popula pa musulmannan Uyghur. Gobierno Chines ta acusa di comete cantidad di violacionnan di derechonan humano contra e Uyghurnan, poniendo nan den camponan di detencion y reeducacion y usando nan pa labor forsa. (Hopi compania tecnologico ta vincula na uso di e labor aki.)

Otro slide traduci pa The Washington Post ta detaya un sistema di vigilancia usa na Xinjiang. E ta papia riba con forsanan di seguridad publico na Urumqi, capital di e region, a usa un sistema di reconocemento di cara pa gara un fugitivo. Na 2020, un reporte di investigadornan di vigilancia di video a detaya trabao di Huawei riba un sistema di reconocemento di cara cu por manda un alerta si ta identifica un persona como un Uyghur. Segun e corant, e presentacionnan pa trabao di Huawei riba sistemanan di vigilancia no ta menciona Uyghurnan, y e compania a nenga cu ta suministra tecnologia directamente na Xinjiang.

Otro slides den reporte di e Post ta detaya tecnologia usa pa identifica hende basa riba nan voz, sistemanan pa track ubicacion di hende basa riba imagennan di vigilancia, y tecnologia pa monitor empleadonan na trabao.

Cantidad di compania ta poni den Entity List di gobierno Mericano – cu ta restringi con companianan Mericano por haci negoshi cu nan – pa supuestamente a yuda gobierno Chines ehecuta vigilancia riba gruponan minoritario den region Xinjiang. Un ehemplo mayor ta DJI, pero tiki a ricibi mesun hopi atencion di gobierno Mericano como Huawei, maske e atencia principalmente a bin di e guera comercial di ex-presidente Trump cu China. Na februari 2020, Merca a sugeri pa companianan di telecomunicacion gasta nan placa cu competidornan di Huawei y a acusa e compania di construi portanan pa spionahe den su ekipo.