Aruba Coffee Roasting Company como e unico compania cu tin un mashin pa roasting koffie na Aruba. Nan kier ofrece un experiencia otro na tur amante di e producto aki na Aruba.
Director di e compania aki, Frank Tieleman, a declara na Bon Dia Aruba cu e obhetivo tras di e actividad aki ta educa nan clientenan consumido di koffie mas ariba e koffie mes. E meta su tras ta pa nan por sa distingui diferente tipo di e producto aki. “Cada bonchi di e luga cu el a crece tin otro sabor,” el a declara.
Sr. Tieleman a bisa cu e cultura di koffie ta creciendo keto bay den e generacion mas jong cu ta mas custumbra estilo di expres capuchino. Pero tambe tin e generacion mas bieu cu ta haci koffie na cas. Pero meymey di e tipo di consumidonan aki tin un grupo cu ta gusta nan koffie instantaneo. E ta haya cu esaki ta un proceso pa e hendenan aki cuminsa custumbra y pa nan siña kico ta e diferencia pa nan aprecia mas e koffie puro.
Otro aspecto adicional tin di haci cu cada manera cu e bebida di koffie ta wordo traha, e ta cambia e sabor di koffie. Esaki ta parti di nan actividad cu nan ta yama The Coffee Experience, pa asina e amante di koffie por balora e consumo di e producto aki di otro manera cu no ta djis prepara un koffie instantaneo.
Presentacion di koffie Africano.
Apesar cu Aruba ta hopi leu for di continente Africano, e luna aki ainda Aruba Coffee Roasting Company tin dos presentacion cu tin di haci cu tres sorto di koffie Africano: Kenya, Congo y Ethiopia. Considerando cu koffie ta original di e continente Africano, y mas specificamente di Ethiopia, nan a cuminsa cu e The Coffee Experience aki, dunando honor na e continente aki
Adriaan Cambronel y Kareen Brooks ta dos hoben bon documenta riba e materia aki. Nan a haci prome un introduccion riba historia di koffie. Despues nan haci uzo di diferente tecnica, metodo y instrumentonan pa prepara koffie. Tur tres metodo ta bira un desafio y un experiencia unico pa cada esunnan cu a participa pa taste di e bebidanan aki.
Nan a splica cu tur e koffie cu nan tin pa elabora nan productonan na Aruba mes ta Arabica cu ta esun mas consumi. Aruba no por cultiva koffie debi cu e haltura no ta esun mas ideal, ya cu koffie ta crece na un haltura entre 1200 pa 1800 meter riba e nivel di lama. Sinembargo Aruba tin un historia den mundo internacional di koffie, ya cu nos isla a bira un tempo, un di e paisnan exportado di e producto aki mas grandi di mundo. Esaki tabata posibel pasobra nos tabata importa nos koffie for di Colombia y despues nos tabata hinca nan den saco -algun di nan cu e stempel Made In Aruba- y exporte pa henter mundo. Un historia conta den e buki E Negoshi di Koffie na Aruba (The Coffee Trade In Aruba).
