Ayera atardi den un conferencia di prensa, The Aruba Black Tie Foundation a anuncia nan fundraising di e aña aki pa asina recauda fondo pa Stichting Leerorkest Aruba e cual ta consisti di un anochi di gala cu cena, musica y hopi ambiente.

Sharine Geerman, presidente di Black Tie Foundation, a expresa cu pa dia 9 di september di e aña aki nan ta bay tin un proyecto grandi pa asina yuda Leerorkest.

Manera Geerman a sigura, Black Tie Foundation a wordo lanta un par di aña atras di un grupo di senador di Junior Chamber International, un di e organisacionnan hubenil mas grandi na mundo, nan ta organisa un evento pa pueblo dirigi pa un organisacion cu tin un necesidad pero cu ta mara na un proyecto permanente.

Den tempo di pandemia hopi proyecto di nan mester a para na unda cu aworaki nan ta den segundo fase pa caba un biblioteca na Colegio Laura Wernet, como esun di mas ultimo cu ta trata di un bus pa scol Dornasol cu den luna aki lo keda cla y Stichting BOB cu a logra haya un mashin di mamografia.

Leerorkest Aruba ta un fundacion cu tin e obhetivo pa a lo largo, duna tur mucha na Aruba e oportunidad pa siña toca un instrumento musical durante scol y nan ta espera cu den futuro, nan lo por haci’e despues di scol tambe.

Ta cientificamente comproba cu toca y traha musica hunto no solamente ta pret, pero tambe ta hopi bon pa e desaroyo total di e mucha. Di e forma aki nan ta siña traha cu otro y desaroya nan confiansa propio. Ademas cu nan creatividad ta wordo stimula di forma cu nan celebro ta traha cu conexion, nan ta siña scucha otro di un forma positivo, tene otro consideracion y yuda otro.

Tur mucha na Aruba ta ricibi les di musica virtual for di Leerorkest Aruba. E persona ta encarga ta un docente di musica pasiona cu ta cuminsa e lesnan di Educacion General di Musica y na cinco scol a expande e metodo aki di Leerorkest unda muchanan ta toca cu instrumentonan di un orkesta real.

E muchanan ta siña di un forma lihe y relaha con pa toca violin, cello, dobel baho, trompet, trombone, cuerno (hoorn), clarinet, flauta of percusion. E meta ta pa nan toca hunto den un orkesta di klas.

Aunke Leerorkest Aruba ta ricibi ayudo financiero for di Leerorkest Nederland, pa medio di subisidio di Ministerio di Husticia y Siguridad di Hulanda. E fundacion aki tin mester di mas sosten tanto na nivel local como internacional y nan ta aplaudi cualkier gesto pa sigura cu e programa di Leerorkest ta keda vigente pa muchanan na Aruba.

Pa realisa nan meta y sigui cu nan lesnan virtual Stichting Leerorkest Aruba mester di e fondonan pa graba y edita tur e les, pa asina muchanan di scol basico por haya les di musica, pero tambe riba na cultura di Aruba.

Di loke ta trata e evento di dia 9 di september, Geerman a indica cu e dia aki ta bay tin 8 ora di fiesta na unda e portanan ta habri 7or caminda personanan ta bay haya nan cena y despues e fiesta ta sigui te cu 3or di marduga.

Durante e cena lo tin musica di Zulaika Geerman y Johnny Scharbaay cu ta bay deleita e hendenan cu piano. Ademas lo ta bay tin tres banda musical como Robert Jeandor y su Solo Banda Show, X-static, Robert Maduro cu Azucar y Metropolis Disco cu sa di haci e anochi inolvidabel, manera Geerman a sigura.

Durante e anochi aki nan lo anuncia varios doorprizes y nan ta bay tin e famoso ‘taxi dancers’ pa e damanan cu ta bay asisti na evento cu no tin pareha y asina ey nan por baila henter anochi.

“Cada hende cu a yuda nos nan ta bay bin pa gosa di un fiesta, pero na mesun tempo nan ta contribui cu mañan ora nan por bisa ora nan wak un proyecto. Nos gosa di e fiesta pero a nos tambe un florin inverti den proyecto ey,” Geerman a bisa.

Di e forma aki nan ta solicita na pueblo di Aruba pa por colabora cu e causa cu e aña aki ta destina na Leerorkest Aruba cu mester sigui desaroya y graba nan lesnan virtual, pa tur mucha na Aruba por sigui haya nan les na nivel musical y cultural.

Esey ta e motibo di e fundraising di e aña aki di The Aruba Black Tie Foundation pa loke Geerman a sigura cu personanan interesa di cumpra ticket por tuma contacto na e numbernan di telefon 567.8937 y 593.4249. Nan tin un balor di 175 florin pa persona, pero ta importante pa menciona cu por wordo aparta nan y paga nan den varios parti.

Geerman tambe a menciona cu costo di bida a bira caro y tin hopi organisacion cu a hisa nan prijs pero nan ta prefera di laga e mesun prijs di varios aña pasa pa pueblo tambe por disfruta di esaki.

The Aruba Black Tie a informa cu si un instancia ta interesa di acerca nan pa bin na remarca pa un proyecto por manda un carta na e-mail: smlgeerman25@gmail.com. Eynan tin cu indica kico e proyecto ta encera y mester ta algo cu nan kier mira, “cu e hendenan cu ta bay cumpra un ticket pa bay baila por mira na unda nan placa ta bay despues, e ta un fundacion pero mester duna un splicacion, e ta mara na algo cu nos mester wak,” Geerman a finalisa.