Thayisa Zieryani Farro ta un hoben adulto cu desde un edad hopi trempan ta activo den diferente actividad y aworaki den edad adulto, y trahando como consehero di belasting, ainda e ta participa den e actividadnan aki y ta practica su hobbynan. Den un entrevista cu Bon Dia Aruba e ta conta di su bida, su hobbynan y con e ta spera di sigui activo den su hobbynan pa hopi aña mas.

BDA: Conta un tiki di bo mes y bo infancia.

Farro: “Banda di cumpli cu scol mi tabata tin un infancia hopi activo unda mi tabata bay les di baile, les di cuarta, ping-pong y tambe tekenles. Di tur e actividadnan aki, e lesnan di baile tabata esun cu mas mi tabata gusta. Despues cu mi a caba basisschool mi a bay Colegio y di e tempo eynan mi tabata sa cu si mi no caba cu mi huiswerk of caba di studia pa un proefwerk, mi no mag bay les di baile, ni maske con hopi mi yora of zeur.

Banda di scol y e actividadnan recreativo, mi tabata pasa hopi tempo cu famia, specialmente cu mi ruman, primonan y primanan. Nos tabata pasa hopi ora pafo ta hunga, bay lama, core bais y weganan di bala. E tabata un temporada hopi dushi y sin mucho stress.”

BDA: Cu cuanto aña bo a cuminsa den e mundo di baile? Y dicon?

Farro: “Mi a cuminsa lesnan di ballet cu 4 aña na Simadanza cu señora Ina Profet. Mi mama a hinca mi den lesnan di ballet teniendo na cuenta cu e mes no tabata tin e oportunidad pa bay ballet. Mi a keda encanta cu ballet despues di e prome lesnan. Di eynan e amor pa baile a cuminsa. Banda di e lesnan di Simadanza mi tabata baila tambe cu Pierewietje cu señora Martha Figaroa. Ora mi a cumpli 10 aña mi a cuminsa cu lesnan di folklore cu señora Astrid Salazar di Simadanza. Poco poco mi a cuminsa participa den mas lesnan di baile na Simadanza entre otro jazz-ballet, modern dance, street dance y tap dance.

Ora cu mi a bay studia den exterior mi a tuma algun lesnan di baile. Asina cu mi a regresa Aruba mi a cuminsa baila bek cu Simadanza. Awor na grandi mi a participa den algun lesnan na ArubaSalsa cu señora Melitza Bermudez y actualmente ta bailando cu Kids and Youth in Action bou liderazgo di señora Debra Boekhoudt.”

BDA: Kico tabata bo richting di estudio?

Farro: “Di ora mi tabata jong mi kier a bira dentista. Ora mi a caba Colegio mi a wordo uitgeloot pa e estudio di dentista na Hulanda. Den e temporada aki mi a bay Belgie (Leuven) pa studia Biomedische Wetenschappen y Verloskunde (partera) cu e pensamento cu den e siguiente añanan si mi lo cay den e loting pa cuminsa e estudio di dentista. Lastimamente esaki no tabata e caso. Despues di 2 aña mi a regresa Aruba. Akinan mi a wordo conseha pa haci e estudio di Ley na Universidad di Aruba teniendo na cuenta cu esaki ta un estudio hopi amplio. Despues cu mi a caba mi Bachelor den Ley mi a haci mi Masters den Belasting (impuesto) na Universidad di Aruba y Universidad di Maastricht. Full algo otro cu dentista, pero toch un estudio cu a siña mi hopi di nos derechonan.”

BDA: Aworaki como adulto hoben, bo ta sinti cu baile a yuda bo bira e persona cu bo ta awe?

Farro: “Mirando back mi ta sinti cu baile a yuda mi ta un persona mas disciplina, determina y responsabel. Bailamento a siña mi priorisa mi tempo pa cumpli cu mi obligacionnan di scol y trabou prome cu mi por bay e lesnan di baile. E ta un momento tambe cu mi por ta creativo y challenge mi mes pa domina un baile/coreografia.”

BDA: Ainda bo ta baila, e ta algo cu bo ta sinti bo lo haci pa hopi aña mas?

Farro: “Mi ta spera cu si! Bailamento a y ta trece hopi felicidad den mi bida. Mi a conoce hopi hende door di baile cu semper mi lo keda cu un admiracion pa nan. Durante e lesnan di baile semper nos ta hari y pasa leuk cu otro. E ta un momento unda e stress di e bida diario ta disparce. Bailamento a wordo prueba di ta baha e risico di malesanan cronico entre otro demencia. Pa es motibo mi ta desea di por tin hopi aña mas bailando pa wanta e curpa y e mente den bon condicion.

BDA: Unda bo ta wak bo mes aki 10 aña?

Farro: “Aki 10 aña mi ta spera cu ainda mi lo ta bailando y ta activo den e mundo di baile y deporte. Mi ta spera di ta den bon salud, pasando mas tempo cu mi famia y conocedonan, uzando mi experencianan di bida pa yuda y inspira otro.”