En conexion cu e celebracion di Dia Internacional di Hende Muhe, Bon Dia Aruba a tene un entrevista cu Thalina Willems, Asistente Trahado Social, di Fundacion Contra Violencia Relacional (FCVR), ken a elabora ariba e trabou di e fundacion, con nan ta brinda ayudo na e hende muhe den dificultad y con nan lo ta celebrando e dia special aki.

Willems a splica cu FCVR ta traha cu cinco pilar. E prome ta e servicio ambulante caminda nan ta yuda clientenan cu kisas no a sali di un relacion abusivo ainda, pero ta purbando di sali di un manera sigur, of puede ser cu nan a sali pero ainda tin e parti di violencia. E clientenan aki sea tin un cas of nan tin familiarnan cu nan por ta sigur cerca dje. Cu e servicio aki e cliente ta haya un trahado social, un psicólogo y un psicologo di mucha pa e muchanan den caso cu tin yiu.

Otro servicio cu nan ta duna y cu nan ta reconoci pe ta e servicio residencial cu ta pa personanan cu a logra sali for di cas, for di un relacion abusivo, pero no ta sinti sigur ainda y nan mester haya un alohamento temporal. Den e servicio aki e cliente ta haya tambe un trahado social, un psicologo pa e adulto y un psicologo di mucha.

El a sigui splica cu nan tin tambe e parti di centro di expertisio y recurso. Cu e servicio aki e fundacion ta duna informacion, ta duna charla, ta yuda hobennan cu presentacion pa scol y nan ta bay diferente instancia y companianan na unda ta brinda informacion di kico abuso ta, kico ta e ‘red flags’ etc. E presetancion ta depende di e peticion di e instancia of compania.

Nan tin e servicio di abogacia, esaki ta encera cu por yuda e cliente ariba un nivel chikito na unda ta bay cu nan haci denuncia y ta boga pa nan. Of riba e nivel macro cu ta promove cambio di legislacion pa mehora den e aspecto aki.

Una bes cu e victima sali for di e situacion peligroso y cu e por tin un luga sigur, ‘safe space’ FCVR ta duna e parti di nazorg pa asina por empodera e victimanan pa evita un ripiticion di cay den un otro tipo di relacion cu por ta abusivo.

El a agrega cu aworaki a pone psicologo pa e muchanan tambe pasobra e muchanan no ta victima secundario mas, manera tabata bisa antes, nan ta victima primario, hunto cu e mayor cu ta wordo agredi y nan tambe master guia y sosten.

Willems a remarca cu hopi cliente no sa e señalnan di abuso of no sa te con leu nan por wak algo como abuso. Segun Willems a enfatiza ta hopi comun cu e victima ta bisa cu nunca nan pareha a dalnan, cu nan no ta wordo abusa, pero toch nan no ta sinti bon y eynan ta tin un liña, un “violentometro”, el a indica, na unda nan por evalua nan mes, riba ki nivel di abuso nan ta sufri.

“E por cuminsa hopi fini. E por cuminsa cu un hende burlando di bo, rebahando bo, yamando bo nomber cu ta un tipo di abuso tambe, abuso verbal y emocional, cu ta abuso psicologico. Tin e abuso cu ta mas conoci cu ta e abuso fisico cu e por ta kinipi, e por ta gara duro, pushamento. Esun emocional tambe por ta cu nan ta pretende di purba agredi bo y esey tambe por tin un efecto,” Willems a splica.

Tambe tin e abuso sexual y abuso vicario, cu ta na unda nan ta haci uso di un pertenencia, hopi biaha na Aruba e mayornan ta haci uso di yiunan, di mascota stima of te hasta di documentonan, manera persmio, caminda ta bisa cu si e bay algo ta pasa y e ora muhe ta sinti e obligacion di keda den e relacion.

Pa loke ta e cantidad di casonan, aña cu pasa, 2022, Willems a señala cu e fundacion a atende aproximadamente 365 cliente ambulatorio solamente di cual 85% tabata hende muhe y e otro 15% tabata hende homber. Esaki ta demostra cu hende homber tambe ta pasa den e situacionnan aki y cu aunke e cifra no ta representa tur caso na Aruba, e ta demostra un aumento.

Willems a remarca cu no tin un cambio mucho grandi den e cantidad di casonan, den e sentido cu e cantidad no ta bahando y e ta keda alrededor di e mesun cifranan. Pero esey, el a enfatisa, ta solamente e casonan cu ta yega na e FCVR. Tin hopi otro caso cu por ta ta sali den noticia, pero cu no ta yega na e fundacion cu nan no por conta pasobra e parti esencial ta cu e participacion di e cliente den e proceso cu e fundacion mester ta boluntario.

El a ratifica cu hopi biaha nan por step in si e cliente no ta cla pa e ayudo, semper esey ta e caso, pero si un familiar of conoci tin miedo cu un bida ta corre peliger, e ora nan ta pasa e caso over pa otro agencia, un di nan ta Slachtofferhulp, cu si tin e posibilidad pa yega na e luga y atende cu esaki hunto cu polis.

“Hopi biaha nos ta encurasha nan pa yama polis of nos ta bisa nos mes por haci e yamada aki pa bo,” Willems a agrega.

En conexion cu e celebracion di Dia internacional di Hende Muhe, for di siman pasa caba hunto cu Prome Minister FCVR a facilita algun discusionnan cu hobennan. Nacionnan Uni e aña aki kier enfoca no solamente ariba e ser femenino pero tambe motivando nan pa drenta den e mundo di STEM industry y tecnologia y innovacion.

Willems a splica cu nan tabatin e discusion ey cu Prome Minister tocante esaki, pero tambe nan a facilita e discussion riba e parti cu tur beneficio tin su peliger y den caso aki e por ta cyber bullying, cyber abuse. Esaki ta encera cu online por manda comentario mahos, por manda message mahos, haci acoso di forma cybernetico y FCRV a splica con e hende muhe por porteha su mes di esaki.

“Nos a discuti no solamente e peliger, pero con nos por usa esaki na nos beneficio. Esey tabata un di e discusionnan cu nos tabatin cu e hobennan di San Nicolas y Oranjestad,” el a bisa.

 

Awe nan ta bay tin un programa cu nan a hinca den otro den e programa ‘Nos Mainta’ cu diferente otro organisacionnan. Diabierna nan ta bay tin algo special pa nan clientenen di e caminda lo tin un sesion di empoderamiento unda nan por siña tocante make up y cuido propio y na final lo haci un photoshoot. Tambe FCVR ta bay tin diferente presentacion den luna di maart.

Por ultimo, Willems a splica tocante e campaña di SOS + adres. El a indica cu esaki ta un campaña cu e fundacion ta keda pusha y e campaña ta encera cu na momento di un situacion peligroso no tur hende tin e habilidad pa tuma contacto cu polis, sea paso e problema ta andando e momento ey y si nan yama nan ta bay denmas peliger. Loke e persona por haci e ora ta tuma contacto cu e FCVR na e number 5671670 na unda nan ta manda solamente SOS + e adres unda nan ta y esey ta e señal cu e persona su bida ta corre peliger y e tin mester di asistencia policial e momento ey y asina FCVR ta haci e yamada na polis y duna e informaicon di adres pa nan yega y brinda e asistencia necesario.