(AP) – Thailand lo haci mas esfuerso pa combati trafico di bida salvahe, pa yuda reduci e riesgo di pandemia aunke e no ta clarifica si esaki ta nifica un final pa tur benta di bida salvahe, incluyendo esunnan exotico
Gobierno di Thailand tin e intencion di haci e pais “liber di benta di bida salvahe” pero tambe pa combati e trafico di bida salvahe, Minister di recurso natural y medio ambiente Waravut Silpa-archa a bisa.
Silpa-archa y otro oficialnan a bisa cu e pandemia a aumenta e urgencia y necesidad y caba cu e trata di bida salvahe y carni illegal, cual ta considera un di e factornan clave den e plamamento di COVID-19, Ebola y algun otro enfermedadnan.
E lema pa e campaña aki ta; “Stop malesa y extincion: Nunca come, cumpra, casa of bende bida salvahe”. Desde cu e minister a lansa e campaña, te ainda no ta conoci si e autoridadnan tin plan di cera tur e tiendanan clandestino cu ta bende un variedad di bestia exotico, te hasta den e capital Bangkok.
Mayoria di e tiendanan ta cera actualmente pero pa motibo cu Thailand ta combatiendo su pio ola di infeccionnan di coronovirus desde cu e pandemia a cuminsa. E prome caso di coronavirus pafo di China, tabata den Thailand, pero e cantidad di caso e permanece abao te cu recientemente na April, unda cu e caso nan a aumenta aunke tabata tin medidanan estricto di cuarentena pa e personanan drentando e pais.
Mientrastanto, e oficialnan ta poniendo nan atencion riba e prevencion di crisis nan futuro, cual ta mara na e plamamento di enfermedadnan manera COVID-19, cual ta plama di bestia pa hende.
Thailand tin un di e regimen mas fuerte den e region pa cu esaki, por lo menos riba papel.
E boet minimo di trafico di especie nan protegi ta 9,000 dollar, hunto cu un sentencia di 10 aña, Silpa-Archa a bisa na un seminario anfitriona pa un fundacion anti trafico yama Freeland.
“Tambe mester considera cu e destruccion di e habitat natural di e bestianan ta forsa animalnan y hendenan biba den proximidad hopi cerca di otro, aumentando e riesgo di contagio di enfermedadnan. Nos mester stop e cadena di benta.” e minister a agrega, “E miho manera pa caba cu e trafico ilegal di bida salvahe ta kibrando su cadena di benta.”
E coronavirus cu ta causa COVID-19 aparentemente a sali di un especie di vleermuis salvahe, aunke e origen exacto di e virus cual a plama di Wuhan na comienso di 2020, ta un topico di cu te ainda ta debati.
Den februari 2020, e gobierno chino a anuncia un prohibicion riba e consumo di bida salvahe. Luna pasa, World Health Organization a publica reglanan cu a duna un lista di tiendanan tradicional cu ta sigur y maneha eticamentamente pero e problemanan ta surgi ora cu no ta evalua bon e bestianan salvahe pa cualkier potencial di riesgo cu despues ta mata y bendi den areanan habri pa e publico.
E mantencion di e bestianan aki den haula den e mesun area unda cu ta maneha e carni cu lo bende, ta aumenta e riesgo di contaminacion. “Ta e ambientenan aki ta duna chens pa e desaroyo di virus cu ta surgi den bestia, manera coronavirus, cual na final ta keda transmiti te ora e yega na hende.” WHO ta bisa.
“Si nos caba cu e trafico di bida salvahe, nos ta tumando un paso sumamente importante y clave den e prevencion di crisis y pandemia.” Pimpavadee Phaholyothin, fundado di World Wildlife Fund-Thailand ta bisa.
