(EFE) – Gobernador di Texas (Merca), republicano Greg Abbott, a anuncia dialuna ultimo inicio di un operacion contra e gang criminal Venezolano Tren de Aragua y a designa e grupo como un organisacion terorista stranhero.
Den un conferencia di prensa na Houston, e ciudad cu mas poblacion di Texas, el a sigura cu e gang ta representa un menasa “peligroso y mortal” den e estado.
“Texas lo usa e cortenan pa stop nan actividadnan (di e Tren de Aragua), lo usa e confiscacion di bienes civil pa tuma nan propiedadnan (…) y sancion penal mas severo pa tene nan den prison,” e politico a bisa ora di anuncia e medidanan.
E gobernador a ordena e creacion di un unidad den e Departamento Estatal di Siguridad Publico dedica na e Tren di Aragua specificamente y cu ta conta cu un “centenar” di agente di ley.
Su anuncio ta bin menos di dos luna prome cu e eleccion presidencial dia 5 di november, den cual e republicanonan a usa discurso xenofobo pa critica e politicanan di inmigracion di e presidente, Joe Biden.
Lidernan Republicano, incluyendo ex-presidente y candidato Donald Trump (2017-2021), a conecta e presencia di miembronan di e gang aki na Merca cu e miles di migrantenan Venezolano cu a yega na frontera sur huyendo di e crisis profundo cu nan ta bibando na e pais Sur Americano.
Un di e principal actividadnan criminal di e Tren di Aragua, cu tin su origen den un prison na 130 kilometer for di Caracas y a expande pa otro paisnan den e region, ta hustamente extorsion y explotacion sexual di migrantenan Venezolano.
Gobernador di Texas, cu ta aspira na solidifica su control riba e legislatura estatal despues di e eleccion di november, ta un di e principal criticonan di Gobierno Democrata y a dedica miyones di dollar pa “preveni” e entrada di migrantenan otro banda di frontera cu Mexico.
Mas di un dozijn di persona cu autoridadnan a conecta na Tren di Aragua a ser acusa di a comete crimen den varios estado den henter e pais, incluyendo Texas, Georgia, Florida y New York.
Un di e casonan mas reporta tabata e asesinato di un mucha muhe di 22 aña, cu yama Laken Riley, door di Jose Antonio Ibarra, un Venezolano identifica pa autoridadnan den e estado como miembro di e organisacion criminal aki.
Autoridadnan federal no a duna cifranan oficial riba e presencia di e gang aki na Merca, pero segun The Wall Street Journal, tin mas cu 1,000 investigacion habri den e pais cu ta envolve “supuesto” miembronan.
Na juli ultimo, Departamento di Tesoro a clasifica Tren de Aragua como un “organisacion criminal transnacional” y Departamento di Estado a sigura cu su red a “extende” for di Sur America pa Merca.
Recientemente, e gang aki a bula riba escena di medionan nacional debi na e publicacion di Trump y otro politiconan Republicano di informacion falso cu ta pretende cu miembronan di Tren di Aragua a tuma control di un edificio di apartamentonan na Aurora (Colorado).
E departamentonan di polis di e area metropolitano di Denver, na Colorado, a nenga e informacion, pero a reconoce cu e organisacion criminal aki si tin un presencia den e area.
