Recientemente EcoGas a laga haci testnan cientifico un biaha mas riba e saconan cu ta wordo dera bou tera y un biaha mas esaki a sali positivo. Den pasado a laga haci e tipo di test aki caba y e esaki tambe a sali positivo. E testnan aki a wordo haci e biaha aki na Merca cu standard mas halto. Esaki ta segun e relato cu Bon Dia a ricibi.
Cu e testnan aki haci di nobo, EcoGas ta garantisa, cu prueba di compania internacional, cu nan ta aplicando e miho formula riba mercado pa deshaci di desperdicio seco. E formula aki ta garantisa cu ta deshaci di desperdicio na un forma corecto y na mes momento ta soluciona e reto di yena buraconan grandi tur rond di nos isla.
Mark Bruce den su funcion di Corporate Technical Director di Test America, a skirbi un carta dia 19 di januari ultimo relaciona cu e pruebanan solicita di EcoGas. Den su rapport, e ta indica cu a efectua diferente metodo pa haci pruebanan necesario riba e di sushi procesa pa EcoGas. Ta referi na metodonan pa evalua Solid Waste, Physical/Chemical Methods. Tur e testnan a sali miho di locual e standard nan internacional ta rekeri.
Actualmente Aruba tin 100 pa 110 mil ton di sushi anualmente cu por procesa den e planta. Esaki ta exclui sushi manera santo, piedra, concret, etc. cu ta wordo procesa na un otro forma. Pa un isla manera Aruba cu 100 mil habitante y un miyon turista pa aña, esaki ta un cantidad hopi grandi di desperdicio, pero mester tene semper den mente cu Aruba ta importa tur cos y no ta fabrica nada cu ta uza e materialnan importa localmente. Hasta paña cu no ta wordo uza mas ta wordo tira afo, tanten cu na hopi otro pais hasta paña ta wordo recicla y exporta.
EcoGas ta e prome fabrica di gasificacion di su tipo den Caribe, den Latino America, pero tambe Norte America. Meta di EcoGas ta pa baha e cantidad di desperdicio nobo cu ta deposita riba dump. Un otro meta ta pa EcoGas sirbi como ehempel pa otro paisnan y bende e experticio cu otro pais y companianan den exterior.
