Den edicion di Diario di ayera, un comunicado di ministerio di Infrastructura ta indica cu e siman aki, desde dialuna te diabierna, ta test e incinerator pa cual a pidi un hindervergunning pa 8 ora diariamente. Esaki segun combersacion cu director di Directie Wetgeving en Juridische Zaken George Croes, no mag. “En principio e mester tin un vergunning ora e ta in bedrijf, ora e ta operacional.”
Maske den combersacion cu e director di departamento huridico a admiti cu e no ta un experto riba e materia di incinerator, y con e testmento di esaki ta hinca den otro, Croes a indica cu pa haci test den sentido cu e ta ‘in bedrijf’ of den otro palabra den operacion, esey ta necesita tin un permiso. Sinembargo, e asunto ta keda padece di poco claridad mirando cu den prome instante e director a indica cu testmento ta algo apart. E director a splica: “Ora di test e, mi no sa con leu, e no mag di funciona manera cu e ta supposed di funciona. Pero si bo ta test pa 5-10 minuut, bo por argumenta cu bo mester vergunning pa esey, pero si ta test di cende paga e ta algo otro.”
Ya pa algun tempo, desde comienso di luna di juli, por a compronde cu lo bay cuminsa e procedura pa pidi permiso pa opera e incinerator y haci esaki operacional. Ta den mesun temporada aki a entrega un peticion pa un permiso pa molester (hindervergunning) na DWJZ. Desde 22 di juli, manera a wordo publica den Bon Dia anteriormente, tabatin oportunidad pa tur ciudadano expresa nan obhecion pa operacion di e incinerator. E oportunidad aki ainda ta habri.
Un di e ciudadanonan cu nos por a compronde cu lo bay entrega un obhecion contra operacion di incinerator ta Anouk Balentina, kende ta biba den becindario di e dump. Ayera merdia Balentina a duna un conferencia di prensa, unda el a declara cu: “ora ta test 8 ora pa dia, mientras tin muchanan cu ta riba vakantie, ta 8 ora den dia muchanan tin cu biba cu e kimamento. Ademas cu opera un incinerator no ta bin sin su riesgonan. Si algo pasa, e lo tin consecuencia pa nos.”
Balentina ta argumenta cu den paisnan mas desaroya cu Aruba, tanto na Merca como na Europa, explosionnan di incinerator ta tuma luga. “Maske aya nan tin tecniconan, y hende specialisa pa lidia cu incinerator. Aworaki ta pone un mashin asina un par di meter leu di un becindario unda
hende ta biba. Mi yiunan mes ta sufri di asma y ta haya hopi molester pa via di e incinerator.”
ROP ta indica cu mester stop dump
Den e plan di desaroyo ROP, Anouk ta cita cu: “e dump na Parkietenbos ta surpasa su capacidad. E meta ta pa cera e dump, sanea esaki y cambia e area. Asina Parkietenbos lo por haya un funcion nobo. Por ehempel pa actividad recreativo. Pa procesamento di desperdicio, un otro facilidad lo wordo apunta.” Ademas Balentina ta apela riba e echo cu bou e areanan proteha cu aworaki a pasa pa Parke Arikok, tambe ta cay e area di mangel na Parkietenbos.
No tin midimento di calidad di aire structural
Un otro punto cu Balentina ta trece dilanti ta cu no tin midimento di calidad di aire structural. Balentina den su caso sumario na corte a haya cierto documentonan di e abogado defendiendo minister Marisol Lopez-Tromp di Infrastructura y Medio Ambiente, unda a indica cu a cumpra un device portable pa asina midi calidad di aire. Esaki segun Balentina no ta suficiente mirando cu e midimento no ta permanente y structura, cual ta nifica cu por bin cu cualkier tipo di polucion sin data obhetivo pa indica ki efecto esaki tin pa calidad di aire.
“Maske cu mi a cana mi caminda na DVG, DOW, Serlimar, tur minister, Parlamento, na Gobernador, y hasta na Corte, mi no a haya ningun resultado. Corte aworaki tin mi on hold.”
Desiree Croes ta representa Balentina
Despues di basta tempo ta procede riba su mes, Balentina a dicidi cu busca un abogado acerca ta necesario. Den e caso aki a scoge pa abogado Desiree Croes, kende den e conferenia a admiti cu e lo mester bay lesa su mes den e materia aki, mirando cu e no ta experto, pero el a indica cu Balentina mes ta trece esaki acerca, y e abogado ta aporta su experticio huridico.
Croes a bisa cu aworaki e ta bay pidi hues pa duna orden pa ehecuta e ordemaatregel cu a entrega na mesun momento cu a cuminsa e caso sumario den februari. Croes a expresa cu: “Mi ta hopi contento cu mi por a representa señora Balentina, pasobra e tabatin hopi forsa y curason pa keda lanta contra polucion, mientras hopi otro ta dicidi cu nan no ta lanta bos. Esaki claro ta pasobra nos ta biba den e cultura di miedo.”
Mas aleu Croes a indica cu “e manera con Corte y tambe pais Aruba ta tratando su persona, ta un falta di respet grandi. Na Aruba bo tin varios bufete di abogado cu gobierno sa uza pero den e caso aki a scoge pa busca un abogado di Corsou como tactica pa purba alarga e caso, cu efecto negativo pa señora. Den ningun manera ta aceptabel cu un caso sumario (kort geding) tin cu tarda 6 luna. Y pa haya un uitspraak nos no lo mester depende di un abogado na Corsou.”
Croes a indica cu den caso sumario a pidi pa no cuminsa, mientras aworaki ta cuminsando e testnan. “Esaki ta algo cu completamente no ta cuadra.” Mirando cu e procedura cu Balentina a entama no a haya resultado cu a spera, mirando cu a keda ‘rek’ e caso, Croes a indica cu si ta necesario lo entama un otro caso sumario, y lo tuma tur paso necesario pa por sigui cana caminda pa haya resultado.
“Señora Balentina a cana e caminda exactamente manera mester a cana. Hasta cu hopi pasenshi sinta warda pa hues tuma decision. Pero aworaki e ta bira di mas. E un punto cu el a pidi pa no pasa, ta pasando aworaki y ainda hues no tin fin di tuma decision.”
