Testigo di Jehova Aruba ta presente congreso mundial ‘Amor no ta caba nunca’

Franki Herms, kende ta un representante di Testigo di Jehova na Aruba, a acerca Bon Dia Aruba pa splica di nan di 6 congreso anual lo tuma luga e fin di siman proximo.

E congreso lo tin diferente tema specifico. “Dios mes a siña boso pa stima otro. Pero tambe tin discurso di apertura: Amor no ta caba nunca. Dicon? Amor no ta caba, anto di eynan ta bin splicacion. Tin otro cosnan cu ta caba. No pone confiansa den locual no ta duradero, entre otro rikesa, of forsa fisicio.”

Pa e parti di atardi, Herms ta splica cu lo tin un simposio cu ta bisa amor no ta caba nunca. E ta expresa cu eynan lo papia tocante hende cu ta pasa den un infancia sin amor, problemanan social, situacion dificil, influencia negativo na scol, malesa cronico of pobresa, of problema familiar di otro topico.

Lo tin miembro di Testigo di Jehova cu lo duna splicacion despues di e congreso, sinembargo, ta splica cu tin facilidad pa tur hende compronde, incluyendo muchanan. Tambe lo enfoca riba tema di naturalesa ‘pa revela Dios su amor’ y pa persona ta apreci’e.

Pa diasabra lo tin discurso di nan bautismo, ora persona ta haci declaracion di nan fe. E ta remarca cu esaki ta wordo haci sin presion y na libertad di cada hende, cu ta prepara y cualifica pa aplica locual nan Bijbel ta bisa.

“Durante diadomingo lo splica hende pa corda cu amor tin pasenshi bondadoso, no ta jaloers, no ta wega, no ta busca su mesun interes. Discurso publico ta un discurso special unda bo ta haya amor berdadero, den un mundo yen di odio. Unda bo ta hay’e? No ta facil. Berdadero amor, unda ta?” e ta expresa.

E proposito di e congreso, segun Herms, ta cu den tempo pasa, Israelitanan tabata reuni hunto pa ‘adora Dios’, anto den caso aki nan ta siña di Dios di nan punto di bista. Agregando cu e ‘unico cos cu no ta pasa di moda ta conseho cu Bijbel ta duna nos’.

Sinembargo, e ta bisa cu e congreso ta pa anima tur hende pa sigui den direccion y adora Dios. Pa biba un bida cu ta sigui e norma, balor y mira ‘efecto den bo mes’. Pa cambia bida di hende y yuda situacion dificil, enfrenta a pesar di problema, y pa demostra amor na otro hende.

Herms ta bisa cu e congreso aki no ta pa mustra hende cu nan ta robes of fout, pasobra tur ta haci cosnan malo, pero cu e persona lo sali y traha riba su mes, ‘pa mehoracion, traha riba cierto punto den bida’.

“E proposito ta pa e persona refina su mes. Satisfaccion y felicidad, pa trata hende cu amor y ta bondadoso; esaki ta duna bo felicidad di con bon nan ta sinti. Y nan lo ser motiva pa mustra e amor ey bek. Un efecto positivo”, Herms ta splica.

Nan kier yega na tur hende, sea cu nan no gusta religion, pero a tende cosnan positivo por atende, ‘nos ta respeta hende di tur religion’ agregando cu ta pa tur hende y nan no ta drenta den bida of obliga hende, ‘nan tin boluntad liber’.

E prome fin di siman, esta di 7 pa 9 di juni y 14 pa 21 juni lo ta na Spaño. Ingles ta di 21 pa 23 di juni, y na Papiamento ta 2 pa 4, 9 pa 11 y 16 pa 18 di augustus. E congreso di e tema ta ‘amor no ta caba nunca’, unda cu Herms ta splica cu tur dia lo tin discurso y video, pa ‘ilustra miho y compronde informacion lihe. ’.

Si e persona a haya e congreso interesante, nan tin e libertad pa sigui bishita, ‘no tin ningun hende cu ta wordo forsa’. Pa finalisa, el a bisa cu e congreso ta mundialmente, unda cu 8.000.000 miyon di Testigo di Jehova ta asisti y invita otro rond di mundo, sin discriminacion.

Cu instruccion di nan Bijbel, nan kier yega na hende pa por mira con nan por beneficia nan mes. Pa contribui cu pas, ekipa den bida y ta prepara pa desafio cu por bin. Entrada ta gratis, y por haya mas informacion riba nan pagina web di Testigo di Jehova.