Ami Momo , Rey di caminda y di ambiente ta cla pa duna su testamento pa finalisa Carnaval 69. Prome cu Momo bay wordo kima, mi ta desea di laga varios punto cu Momo ta desea pa nos traha riba dje pa asina prepara pa Carnaval 70.

1. Momo a instrui SMAC cu nan no mag tuma mas cu 1 luna di vakantie pa asina SMAC cuminsa traha mesora pa Carnaval 70, cu ta carnaval di lustro.

2. Momo ta contento di wak cambionan cu a wordo haci den nos carnaval, Momo ta consciente cu hopi hende nos kier bay cu cambio , pero mester corda cu mundo ta sigui draai, despues di 2 aña nos ta outside again. Great di por a mira tur reina den mesun costume pa asina luci riba escenario.

3. Despues di wak tur e paradanan escolar y mira con e hobennan a goza Momo ta kere cu lo ta un bon idea otro aña Carnaval 70 trece bek e teener parade, Momo ta convenci cu scolnan por uni pa bin cu ideanan innovativo pa di un jump up esaki por bira un parada escolar.

4. Mi no sa si mi a yega di confesa esaki pero Momo tin miedo di spirito , pero for di ora mi a scucha Casper den luna di November den Centro di Bario Playa Pabou, Momo a haya un nice y good feeling, ken por a pensa cu un hoben cu ta saki Rookie ta bay cu e corona di Soca 2023, Momo ta spera cu hobennan sigui bin cu iniciativa pa participa den e festival mas grandi di Carnaval cu ta Caiso y Soca, Momo ta conta cu nos hobennan.

5. Momo kier a felicita tur grupo di Carnaval cu a participa, Tur grupo a trece nan creatividad, Momo ta hopi orguyoso di boso y tur grupo cu e aña aki no a make it, cuminsa traha di awor pa asina boso tambe por luci den Carnaval 70.

6. Momo si kier a bisa cu Momo ta basta preocupa cu e uso excesivo di alcohol memey di e adulto hobennan y tambe e uso exagera di alcohol durante paradanan di anochi y cu a resulta den detencion, spera cu otro aña tur hende ta mas consciente y cu respet pa nan mes. Si bo no por controla e alcohol keda cas pa Evita problema pa bo mes y otro.

​

7. Un palabra di pabien na Cuerpo Policial, cu ta forma parti di e team di stakeholders pa cuida Carnaval,nan a traha hopi overtime pero a traha pa cuida nos ciudadanonan, hasta Momo a mira un miembro di polis yuda pusha un roadpiece pa no tranca e parada… tambe na Ambulance, Brandweer, DOW, DIP y DTI y miembronan di SMAC.

8. Momo a keda sorprendi cu Festival di Tumba, Momo a kere cu ta bay bira un cos di un ora pero Momo a ekiboca, tabata un anochi di bon tumba, Mi ta spera cu e tumberonan haci nan esfuerso presenta Tumba aki mes riba nan isla, si bo ta biba aki lo ta great pa bo tumba zona aki tambe.

9. Momo a gusta e idea cu miembronan di SMAC a laga traha un trahe Carnavalesco pa nan luci durante e ultimo dos paradanan , boso a keda unico, Momo ta aprecia e esfuerso di boso banda.

10. Momo a haya hopi falta di figuranan clave canto di caminda ora mi a haci mi recorido riba e ruta di Carnaval. Ta prome biaha cu Carnaval ta riba caya sin cu e la wordo compaña pa e voz y programa Aki Aya tur diadomingo mainta, Ta hopi aña Momo a goza di e programanan di nos amigo Ruben Garcia, mi ta spera cu unda cu Skorpio ta e ta contento di loke Aruba ta produci, papiando di produci tambe Momo a haya falta di el gordo que produce Roberto A Geerman cu semper tabata presenta su Carnathon. Boso a haci falta.

11. Carnaval ta yegando na su final , Momo ta hopi cansa , mi sa cu nos ta gusta Carnaval, pero nos tin hopi parada, ta con nos ta bay haci otro aña pasobra otro aña Carnaval ta caba dia 11 di Februari. Momo ta recomenda kisas pone menos parada pero no asina hopi paso mi pia, lomba, heup tur cos ta dolor, kisas ta e edad?

12. Momo ta recomenda SMAC pa corda un poco riba historia di Carnaval. Ta na unda atrobe nan a subi caya cu trahenan di Carnaval y tocando riba nan bari, y tabata wordo manda cas paso no tabata permiti pa celebra Carnaval riba caya. Si San Nicolas , Momo ta recomenda pa pone un atencion special na San Nicolas.

13. Na prins y pancho grandi y adulto, na reina Adri y Sra. Carnaval Shera, unda cu boso bay, unda cu boso draai hinca Carnaval den boso zwaai. Ami ta cla pa bay pero min ta yora Malai paso otro aña ta setenta y nos ta pa nos cuenta.

Mi kier a laga boso cu e mensahe aki :

Ban mustra mas empatia, mas solidaridad, mas comprendemento, Uni nos por sigui bay dilanti, semper reconociendo e balor y capacidad y potencial creativo di nos hendenan. Ban reconoce e balor di Arte y Cultura y di creatividad. Ban ta consciente cu Carnaval ta un di e festivalnan cultural mas importante di nos isla. Aportando inmensamente na Aruba su economia.

Ban laga nos carnaval sigui briya.

Un Saludo Carnavalesco,

MOMO