Diferente opinion a surgi den dianan aki pa loke ta trata e pruebanan pa detecta e virus Covid-19 y cu segun Organisacion Mundial di Salud (WHO) a señala cu pa lucha contra dje tin cu haci pruebanan di deteccion y tuma e miho medidanan pa haci’e di manera confiabel cu lo mustra datonan real riba e situacion.

Diasabra ultimo, Departamento di Salud Publico a conseha comunidad di Aruba pa no haci prueba anticuerpo pa diferente motibo, entre nan cu ta wordo usa mas bien pa mira si e persona den pasado tabatin e virus.

Bon Dia Aruba a investiga cu prueba ‘Polymerase Chain Reaction’ (PCR test) ta e tipo di prueba di diagnostico cu durante añanan a wordo utilisa na diferente crisis publico den relacion cu malesanan infeccioso na rond di mundo.

A bin desaroya e pruebanan aki desde cu pandemia Covid-19 a cuminsa, sinembargo e test rapido recientemente a wordo incorpora y manera su nomber ta indica , nan ta actua mas senciyo y lihe. Nan dos ta sirbi pa comproba si un persona ta infecta of no pa Covid-19.

Ora un prueba diagnostico ta wordo realisa cu PCR, loke por detecta ta un fragmento di e material genetico di un patogeno of microorganismo, esaki ta di uso comun den laboratorionan di microbiologia na hospitalnan, centro di investigacion y universidadnan, basa den e caracteristicanan di stabilidad di calor di un enzym. E ta detecta e virus den e prome fase respiratorio.

Despues di e analisis di laboratorio di microbiologia di un muestra respiratorio di un persona sospechoso di tin e virus, si e prueba ta detecta ARN di e virus e ta Sali positivo, di otro banda, si e prueba PCR no ta detecta material genetico di e virus, e persona no ta infecta.

A pesar di e eficacia di e prueba PCR a surgi e necesidad di inclui un diagnostico mas lihe pa via di e evolucion di e virus, esun cu na 10 of 15 minuut por duna di conoce si un persona ta infecta cu Covid of no, na diferencia di PCR cu por tarda algun oranan.

Ta existi dos test rapido, prome ta esun cu ta wordo realisa a traves di un muestra di sanger y e otro ta trata di muestra den e nanishi cu por identifica e proteina di e virus,  esakinan ta mas economico y ta permiti pa e profesionalnan medico por realisa e prueba na cas di e pashentnan sospechoso di padece Covid-19. Pero, su parti negativo ta cu nan no tin e credibilidad cu e prueba di PCR tin.

Esun cu ta wordo realisa cu muestra di sanger, ta capaz di detecta anticuerpo produci door di e virus, esaki no ta sirbi pa un fase inicial pa motibo cu no ta detecta e virus, su analisis ta determina si e persona a haya e virus caba y cu den futuro por yuda pa sa ki parti di e poblacion a supera e virus y cua di nan ta vulnerabel pa hay’e.

WHO ta adverti cu te ainda no ta existi suficiente evidencia pa conoce si tin anticuerpo cu ta nifica cu e persona ta protegi contra un infeccion nobo di Covid-19. Te ainda no sa cua ta e nivel di inmunidad ni cuanto lo dura, estudionan ta sigui.

Un beneficio di e prueba aki ta cu e personanan cu a wordo recupera di Covid por ta cu nan lo por tin e escogencia pa duna plasma, un parti di e sanger. E plasma aki lo por wordo usa pa trata otro pashentnan cu tin un malesa grave y stimula su capacidad pa combati e virus.

Di otro banda, a wordo introduci na Aruba e aplicacion ‘Aruba Health App’, ora e personanan lo bay haci test di Covid-19 Departamento di Salud Publico ta wordo pidi pa por registra, e personanan residente di e isla lo mester haci’e como ‘New Registration Local’.

Ademas, a informa cu e aplicacion a wordo diseña pa facilita e proceso di entrega di resultado di test haci di covid-19. Tur local cu ta bay test na Centro Diagnostico of na Test Center Hospital ta wordo rekeri pa registra prome cu nan yega via e link aki http://aruba.dvgapp.org

Pa medio di e ‘Aruba Health App’ e persona lo ricibi e resultado di e prueba haci ariba e dia ey. Si e test ta uno negativo, lo no ricibi ningun yamada di DVG. Si e test ta positivo, bo persona lo wordo yama pa DVG pa asina sigui e instruccionnan.

Di mesun manera, a informa cu cuatro laboratorio a wordo acredita pa gobierno pa asina nan por ofrece e servicio di pruebanan aki.

Tambe, a duna di conoce cu personanan cu tabatin contacto cu un persona positivo y no tin sintoma por bay traha, pero ta wordo instrui pa tuma tur medida di higiena y proteccion necesario. Uzo di mondmask pa persona ta bira obligatorio tur caminda bay den cuarentena e proximo 14 dianan. Na prome indicacion di sintoma e persona mester tuma contacto cu dokter di cas.