Nelly Schotborgh, orado durante e simposio di bon gobernacion cu a tuma luga september ultimo a splica e causanan principal di corupcion den Caribe Hulandes. Sra. Schotborgh a investiga casonan di corupcion den corte di Caribe Hulandes como tanto yuda cuminsa un campaña pa conscientisa riba e topico.

 Den pleno formacion di un gobierno di coalicion nobo nos por mira cu tin un interes grandi pa bon gobernacion y integridad di parti di tur tres partido cu lo forma parti di Aruba su prome coalicion den e ultimo 16 aña. Tambe mirando e noticia cu investigacion den caso Ibis ainda ta tumando luga, pero no a duna ningun resultado concreto te ainda, no ta sorprendente cu opositornan politico tin un interes asina grandi pa e tematica di integridad den gobierno.

Pero kico concretamente por wordo bisa di corupcion den gobierno? Nos lo trece dilanti e discurso cu Nelly Schotborgh a hiba dilanti durante e simposio di bon gobernacion organisa pa Fundacion pa Gobernacion di Calidad (FGCA) september ultimo. Sra. Schotborgh a studia criminologia y bon gobernacion na e Vrije Universiteit van Amsterdam.

 

Casonan di corupcion den Reino
Na e universidad sra. Schotborgh a traha riba su tesis titula De wortels van ambtelijke fraude en Corruptie in Caribisch Nederland. Pa loke ta trata corupcion den Reino, sra. Schotborgh a investiga un total di 46 caso di corupcion di aña 2000 te 2015 den corte di apelacion y corte di prome instancia na Aruba, Corsou, Sint Maarten, Bonaire, Sint Eustatius y Saba. Na Aruba y Sint Maarten e casonan tabata conta un total di 11, mientras na Corsou e cantidad tabata 22 y na e islanan BES tabatin 2 caso cu sra. Schotborgh a haya. Si tin mas corupcion na Corsou compara cu Aruba esaki sra. Schotborgh no a tribi di bisa. ‘Esaki solamente ta casonan cu ta wordo investiga na nivel di corte di prome instancia y corte di apelacion, pues mi no a investiga casonan den hoger beroep’. Alabes sra. Schotborgh a splica cu esaki solamente ta un analisis al momento di e situacion. Pues den realidad ta posibel cu e situacion ta cambiando.

Sinembargo segun sra. Schotborgh e analisis cu el a haci ta mustra claramente e division entre e diferente sector unda corupcion ta tuma luga. Di e casonan cu el a analisa, 18 di nan (39%) ta pertenece na cadena di husticia, mientras 6 di nan ta pertenece na trafico, infrastructura of desaroyo teritorial (13%). Encuanto proceduranan cu ta enfrenta cu corupcion, 13 di e casonan (27%) ta trata tramitacion di permisonan. “Permiso di estadia, permiso pa construi of cualkier proceso di permiso posiblemente ta mira hopi corupcion pasobra tin biaha e procedura pa obtene e permisonan aki no ta bon defini of bon conoci. Alabes permisonan tambe ta un area unda cu por sirbi interes individual mas cu interes general”.

Locual ta bay fout den casonan di corupcion
E rasonnan di con corupcion ta inicia of ta tuma luga sra. Schotborgh tambe a analisa durante su investigacionnan. E por a conclui cu tin 5 rasonnan principal cu ta causa corupcion.

E prome ta cu hopi biaha e lidernan ta iniciado den casonan di corupcion. Pues e hefe di departamentonan of te hasta ministernan mes ta esnan cu ta hunga un rol den corupcion. Sinembargo sra. Schotborgh a subraya cu no semper e lider ta esun cu ta hiba e crimen dilanti. Den 53% di e casonan cu el a studia esaki tabata e caso, pero e por ta mas compleho cu esaki. Aunke sra. Schotborgh a bisa si cu esnan cu tin mas poder tin mas oportunidad pa maluza e poder aki. “Cultura den un organisacion tambe por hunga un rol hopi importante. P’esey lidernan cu ta ehempel ta asina necesario. Hopi biaha tin un cultura unda nunca mag di critica e lider. Si un persona critica e lider ta posibel cu nan lo haya algun menasa di un forma of otro”.

Sinembargo sra. Schotborgh a remarca cu hopi biaha e opuesto ta tuma luga, esta cu tin un indiferencia colectivo ta tuma luga den e organisacion. E fout no ta sinta solamente cu personanan, si no tambe den polisa of maneho pa loke ta trata integridad, segun sra. Schotborgh. Den un tercer di e casonan cu el a investiga, apelacionnan y advertencianan a wordo ignora. Pues e control t’ey pero e ta wordo ignora. Esaki tambe ta conta pa polisanan di integridad, hopi biaha por mira cu tin leynan of maneho pa anda cu integridad pero esakinan ta wordo ignora.

Campaña di conscientisacion na Corsou
Loke ta importante segun sra. Schotborgh, ta pa conscientisa publico en general tocante corupcion y su consecuencianan. Tambe pa ta mas habri pa papia di e topico compleho aki. Pa elabora riba esaki sra. Schotborgh a conta con el a yuda Fundashon Korsou Transparente (FKT) cuminsa cu un campaña di conscientisacion.

“Hopi biaha nos ta mira corupcion manera un concepto cu por tuma luga den gobierno so, pero manera tur problemanan compleho, e ta cuminsa cu e individual. Por ehempel, simplemente por cuestiona bo mesun integridad pa medio di puntra bo mes cuanto biaha bo a yega di meld AO sin sinti malo”. Di e manera aki a bin e idea pa bin cu un campaña di conscientisacion na Corsou. E movemento yama ‘mi mannan ta limpi’ a wordo inspira pa un organisacion di Sur Africa, Corruption Watch.

“Nos di FKT tabata hopi inspira pa nan campañanan pues nos a tuma contacto cu nan. Nan tabata contento cu un luga asina leu a tuma interes den nan accionnan, pues nan a yuda nos cu tur nan experticio y material di campaña”.

Sra. Schotborgh y nan ekipo a hiba un campaña riba social media pa asina purba informa publico en general tocante topico di corupcion. Pero tambe nan a organisa eventonan unda nan a pidi publico pa yena cuestionario riba tematica di integridad personal. Tambe a haci algun lie detector test. “E testnan di lie detector no tabata haci cu un lie detector di berdad, pero asina nos a logra activa hende pa ta mas consciente di integridad na nivel personal”.

Den un proximo edicion nos lo elabora mas riba e topiconan cu orado Willeke Slingerland a hiba dilanti durante e simposio, cual ta encera entre otro network di corupcion, corupcion na nivel di Union Europeo y e importancia di un movemento di poderacion di hende muhe pa yuda combati corupcion.