(CuraçaoChronicle) – Den ausencia di sosten di likides di Hulanda, gobierno di Corsou ta bay confronta un tesoro casi bashi for di proximo luna caba. E likides disponible ta apenas 7.2 miyon florin.
Un luna despues, ta bay tin escasez serio di likides. Esaki segun e pronosticonan mas recien di Ministerio di Finanzas.
E pronostico aki ta inclui e sosten financiero ricibi for di Hulanda anteriormente, di 75.5 miyon y 92.5 miyon (un total di 168 miyon) pero no ta inclui cualkier likides adicional cu a solicita y cu ainda mester otorga pa di cuatro kwartaal.
Despues di e ultimo tranche parcial, gobierno ainda ta den cifranan positivo e luna aki, october, cu +62.9 miyon florin cash. Despues di esaki, e fluho di cash ta bay reduci rapidamente proximo luna, y e posicion di likides proyecta ta bay ta +7.2 miyon florin na november.
E ultimo luna di e segundo aña di crisis di coronavirus, december 2021, Pais Corsou ta bay cera cu un likides provisionalmente spera di -121.6 miyon. Esaki ta, un biaha mas, sin conta cu sosten di Hulanda.
Gobierno di Pisas a indica cu tin mester di 203 miyon florin pa e ultimo tres luna, mientras Colegio di Supervision Financiero (CFT) no lo kier bay mas cu 76 miyon.
E lista di deseo di Corsou tambe ta inclui 29 miyon pa inversion riba caminda, cu ta den mal condicion, y 88 miyon pa sostene cuido di salud mediante e asina-yama buffer di reserva di Banco di Seguro Social (SVB). Pa fin di october, Conseho di Minister di Reino ta bay dicidi riba prestamonan adicional – liber di interes – pa top up tesoro di gobierno di Corsou.
E Fondo di Crimen ta contene 20.8 miyon, pero e likidesnan aki no ta inclui den e posicion di likides di e pais, segun e pronostico.
E pronostico di e ministerio ta mustra cu tin structuralmente hopi mas gasto cu entrada di gobierno. Na november, e gasto total ta 214.6 miyon, compara cu apenas 158.9 miyon den entrada; na december esaki ta 312 miyon den gasto versus 173.2 miyon den entrada.
