(AP) – Tesla ta pidiendo back casi tur vehiculo bendi na Merca, mas di 2 miyon, pa actualisa software y drecha un sistema defectuoso cu tin e funcion di sigura cu e chauffeurnan ta prestando atencion ora di usa piloto automatico.
Documentonan publica diaranson pa reguladornan di siguridad Mericano a bisa cu e actualisacion lo aumenta e advertencianan y alertanan na chauffeur y limita e areanan unda e version basico di piloto automatico por opera.
E accion aki ta bini despues di un investigacion di 2 aña haci pa National highway Traffic Safety Administration tocante un serie di accident cu a tuma luga mientras e piloto automatico parcial tabata den uso, algun di nan tabata mortal. E agencia ta bisa cu su investigacion a haya cu e metodo di e piloto automatico por sigura cu e chauffeur ta prestando atencion ta inadecua y por causa un “mal uso di e sistema.” El a agrega cu e control y alertanan lo “encurasha e chauffeur pa cumpli cu nan responsabilidad continuo tras di stuur,” e documentonan a informa.
Expertonan di siguridad ta bisa cu mientras e accion ta un bon paso, e ta sigui haci e chauffeur responsabel y no ta drecha e problema clave cu Tesla su sistemanan tin un problema cu mira y stop pa obstaculonan den su caminda. E modelonan cu ta pidiendo back ta cubri modelonan Y, S, 3 y X produci entre dia 5 di october 2012 y dia 7 di december di e aña aki. E actualisacion lo ser manda na cierto vehiculonan afecta riba diamars mientras e resto lo haya esaki mas despues.
E intento pa atende e fayonan den e piloto automatico a parce un caso di ‘too little, too late’ pa Dillon Angulo, ken tabata seriamente herida den un accident cu a tuma luga na aña 2019 cu un Tesla usando e tecnologia na Florida, y unda e software aki no ta supposed di traha. “E tecnologia aki no ta safe, nos mester kita esaki for di caminda,” Angulo a expresa, ken ta demandando Tesla mientras e ta recupera di heridanan cu ta inclui golpi fuerte n su cerebro y wesonan kibra. “Gobierno mester haci algo pa cu esaki. Nos no por sigui experimenta.”
