(AP) – Tesla ta pidiendo back 579,000 vehiculo na Merca pa causa di un funcion ‘boombox’ cual por toca audio via un speaker externo y por stroba peatonnan di tende cualkier advertencia.
Esaki ta marca e di 4 biaha cu Tesla mester pidi vehiculo back den e ultimo 2 simannan aki mirando cu reguladornan di siguridad di Merca a aumenta nan critica di e nacion su fabricante di auto electrico mas grandi. Den dos di e incidentenan aki, Tesla a tuma decisionnan cu ta viola e standard federal di siguridad di vehiculo, mientras cu e otronan tabata eror di e programacion.
E vehiculonan tin loke Tesla ta yama un funcion ‘Boombox’ cual ta permiti e persona den e auto toca audionan mientras cu e auto ta moviendo, segun data riba National Highway Traffic Safety Administration su website riba diahuebs. Esaki ta viola standard di siguridad federal cual ta rekeri pa e vehiculonan electrico tin zonidonan di advertencia pa peatonnan, cual tin tiki volumen ora cu e auto ta moviendo, e agencia a bisa.
E problema lo ser repara cu un actualisacion di e programacion den e auto cu lo kita e funcion ‘Boombox’ mientras cu e auto ta coriendo, den reverse of den neutral, haciendo esaki util solamente ora e auto ta para.
“E funcion ‘Boombox’ ta permiti un cliente toca un cierto audio via e speaker di PWS (Pedestrian Warning System) cual ta externo, ora cu e auto ta sea para of durante uso,” NHTSA a bisa den documentonan publica riba nan website. “Mientras cu ‘Boombox’ y e ‘PWS’ ta exclusivo uno y e otro, audionan toca pa medio di e funcion ‘Boombox’ por ser usa pa stroba of preveni e PWS di cumpli cu su funcion, pues di alerta e peaton,” e agencia a sigui skirbi.
E orden aki ta cubri cierto modelo di entre aña 2020 te cu aña 2022, cual ta e vehiculonan di modelo X, S y Y, conhuntamente cu e modelo 3s cual ta entre aña 2017 y 2022, segun e recordnan.
