(AP) – Tesla lo traha cu Mozambique pa un componente clave den e fabricacion di e bateria pa nan auto electrico den loke analistanan ta bisa ta e prome acuerdo di su tipo, diseña pa reduci e dependencia riba China.

Elon Muskc su compania a firma un acuerdo luna pasa cu Australia su Syrah Resources, cual ta opera un di e minanan di ‘graphite’ mas grandi mundialmente den e pais Sur Africano. E ta un acuerdo unico entre e fabricante di auto electrico y e productor di e mineral cu ta critico pa e baterianan aki di lithium. E balor di e acuerdo aki no a ser revela.

Tesla lo cumpra e material for di e compania su planta na Vidalia, Louisiana, cual ta ricibi e ‘graphite’ for di su mina na Balama, Mozambique. E fabricante di auto electrico basa na Austin, Texas tin plan di cumpra e hasta 80 porciento di loke e planta ta produci, cual ta 8,000 tonelada di ‘graphite’ pa aña cuminsando for di 2025, segun e acuerdo. Syrah mester comproba cu e material ta cumpli cu Tesla su standardnan.

E acuerdo aki ta parti di Tesla su plan di aumenta e capacidad di traha bateria pa nan por reduci e dependencia riba China, cual ta domina e mercado di ‘graphite’ mundialmente, segun Simon Moores di proveedor di datonan di material di bateria y inteligencia, Benchmark Mineral Intelligence.

“E ta cuminsa cu geopolitica,” Moores a bisa. “Merca kier crea suficiente capacidad domestico pa por crea e baterianan aki dentro di e pais. Y e trato aki lo permiti Testa haya nan ‘graphite’ domesticamente, independiente di China.”

Moores a bisa cu produccion di e bateria na Merca lo reduci algun di e preguntanan y dudanan cu Tesla ta enfrentando pa cu nan relacion cu China, unda cu tin preocupacionnan di medio ambiental na algun mina. E fabricante di auto tambe a crea un sala di demostracion den e region di Xinjiang, unda cu oficialnan Chino ta acusa di forsa labor y abuso di otro derechonan humano, mas tanto contra di minorianan etnico Musulman.

Un mensahe a ser laga pidiendo comentario di Tesla, cual a disolve su departamento dedica na relacionnan cu medio.

E industria di bateria a ser confronta cu un suministro escaso di ‘graphite’ den e lunanan recien, Moores a bisa. ‘Graphite’ ta warda lithium dentro di e bateria te ora cu esaki ser necesita pa genera electricidad pa medio di split esaki den ion carga y electron.

E ta bini den un temporada unda varios fabricante di auto ta purbando di crea vehiculo electrico den bista di preocupacionnan cu cambio di clima.

Tesla ta trahando casi un miyon vehiculo electrico pa aña, y e suministro di bateria ta su problema mas grandi. “Nan a mehora nan mesun capacidad di fabricacion di bateria,” Moores a bisa, sinembargo te ainda “nan no por yega na suficiente bateria.”

Un fabrica di bateria nobo cu e compania ta construyendo den Austin, Texas, lo permiti e compania yega mas cerca di ta auto suficiente, pero Moores a bisa cu te ainda nan ta cumprando bateria di otro fabricantenan, y “esaki no lo cambia den e decada aki.”

Por ehempel, Tesla tin un acuerdo cu Panasonic pa traha e celula di e bateria na e fabricante su fabrica di bateria na Reno, NEvada.

E trato cu Syrah ta parti di un esfuerso mas amplio di trahadonan di auto pa segura materialnan relativamente escaso pa bateria, mirando cu e demanda pa autonan electrico ta premira di aumenta, segun Sam Abuelsamid, analista principal di Guidehouse Insights.

E trato tambe ta trece e ‘graphite’ procesa na Louisiana hopi mas cerca di Tesla su fabricanan na Merca.

“E pandemia a mustra nos cu nos tin un cadena hopi hopi largo di suministro, y e no ta tuma hopi pa kibra of stroba e cadena aki,” Donald Sadoway a bisa, ken ta profesor di kimica di material na Massachussets Institute of Technology. “Un persona por diripiente bisa, ‘nos ta bay subi nos prijs,’ of ‘nos ta nenga di entrega e carga.’”

E ta tiki probabel cu e acuerdo cu Syrah lo preocupa e gobierno Chino pa motibo cu China tin varios mercado pa su ‘graphite’, incluyendo su propio mercado cu ta aumentando pa vehiculonan electrico, Abuelsamid a conta.

China, sinembargo, ta Tesla su mercado global mas grandi. E tin un fabrica gigante na Shanghai, y ta bende mas o menos 450,000 vehiculo pa aña aki, compara cu e mas o menos 350,000 na Merca.

Pa e compania di mina Australiano, e trato aki ta “crucial” pa motibo cu e tin un cliente cu no ta Chino pa su productonan di ‘graphite’ Moores a splica.

Syrah su mina di ‘graphite’ na Mozambique su provincia, Cabo Delgado, ta un di esunnan mas grandi mundialmente, cu un habilidad di produci 350,000 tonelada pa aña.

Cabo Delgado a enfrenta violencia den e ananan reciente di parti di extremista Islam, algo cu recientemente a extende e areanan te na e provincia di Niassa.

E mina aki ta riba e caya principal conectando Cabo Delgado y e provincia di Niassa. Na un ceremonia pa bolbe habri e caya aki den december, President Filipe Nyusi a haci un yamada pa vigilancia pa asina e caya no ser comprometi.