Fin di e siman aki casi 1 aña di preparacion, dedicacion, motivacion y determinacion lo refleha riba escenario. Diasabra lo tin e competencia di Mr. Aruba “National Bodybuilding & Fitness Championship”, na Marriott Resort & Casino.
Gym ta algo cu Terrance Ras (38) a bay desde cu e tabatin 13/14 aña. E tempo aki djis experimentando cu diferente mashin y peso pa logra tin ‘e body’. Creciendo gym y otro deportenan manera Volleyball, Basketball, landamento, Baseball entre otro, tabata locual cu tabata regularmente den su dia. Un accident rond di ora e tabatin 20 aña a kibra su pia den varios pida, limitando e di haci deporte intensivo. Algo cu te dia di awe cu ta strobe di yega su potencial fisico, e ta bisa.
Semper Terrance a keda train den gym, pero ta te 4 aña pasa cu el a wordo introduci cu e posibilidad pa participa den competencia di Bodybuilding. Algo completamente nobo pe, pero tabata kere den su mes cu e por logra tin un bon curpa riba e escenario. E categoria cu a hala su atencion mas ta esun di Men’s Physique como cu e ta refleha un curpa fit, hopi definicion, no mes tanto musculuso (grandi) compara cu otro categorianan di bodybuilding y tambe tin menos enfoke pa e definicion di musculonan na pia, cual teniendo na cuenta su lesion, e no por train nan mucho duro. Aña pasa el a competi pa prome biaha y a logra cay den e finalistanan. E aña aki e ta bay den e mesun categoria atrobe. E categoria aki no ta uno cu ta existi hopi aña, pero sigur tin interes di hopi y hopi biaha tin mas competidor den e categoria di Physique cual ta wordo separa pa e categoria halto y cortico.
Cosnan pa considera
“Ami ta bisa tur hende cu kier bay den e deporte aki, cu mentalmente y fisicamente nan mester ta 100% den dje. E ta exigi hopi tempo tambe di bo y ta costoso. Pues ta cosnan cu bo mester evalua sigur prome cu bo cuminsa cu preparacion pa competi.” Banda di esaki Terrance a splica cu henter su estilo di bida a cambia door di e deporte aki. “Carnaval enbes di bebe alcohol, come BBQ y celebra cu amigonan, mi ta bebe awa y bay den auto come cuminda cada 2 pa 3 ora.”
Comemento
Pa loke ta e parti di cuminda/ alimentacion, e budget ta hopi importante pasobra e costonan por yega facil 500 florin pa suplemento so. Esaki ta sin conta e costo di e 6 cumindanan pa dia, cual ta carni abou na vet, galiña of kalakuna, salmou, berdura, batata dushi etc. “Esaki ta e parti mas immportante di henter e preparacion pa bo mustra bon riba escenario ‘abs are made in the kitchen, not in the gym’. Si bo no por mantene bo mes na e plan di comemento, e lo ta hopi dificil pa bo mustra e miho version di bo na final. Den 1 siman comiendo malo bo por kita tur progreso cu bo a haci durante varios luna. Esey ta mescos cu bo a tira placa afo.”
Entrenamento
E cantidad di tempo cu ta pasa den gym entrenando ta varia dependiendo cuanto tempo falta pa e competencia, pero tambe cuanto peso bo tin pa baha. Ora ta falta varios luna pa e competencia, Terrance a splica cu e ta pasa entre 1ora y mey te cu 2ora den gym. Sinembargo segun e fecha ta yega cerca esaki a subi pa 2ora y mey pa 3ora. E cantidad di cardio vs peso cu ta train den gym tambe ta totalmente depende na e progreso di bo curpa. “E ta esencial pa bo tin un coach, bo mester un hende pa guia bo. Importante pa e tin experiencia y sa kico e ta haci, pasobra e lo chech bo progreso y haci adaptacion na bo training y comemento segun e simannan ta pasa”.
Producto favorito
A puntra Terrance kico ta e producto cu mas e ta gusta y lo recomenda un otro. El a bisa: “Tin un bebida ‘Bang’ cu ta un lifesaver. Vooral pa e ultimo tempo aki cu mi ta mas cansa, e ta un boost di energia cu mi echt mester ora di train. E bebida ta contene super creatine y bcaa, y ta un energy drink cu no tin caloria, ni sucu. DH Nutrition ta trece esaki Aruba, un compania cu semper ta yuda nos atletanan, Danki Ronny Chen.
Concluyendo Terrance a bisa: “Awo cu ta practicamente den porta di e competencia ta caba di perfecciona ultimo detayenan y despues sosega y warda e dia yega”.
