E relacion entre Colombia y Cuba ta den tension maximo despues di un reunion cu e canciyernan di ambos pais a sostene diadomingo pasa, den cual nan no a yega na un acuerdo riba e solicitud cu 11 di september pasa Colombia a haci pa e isla: entrega e hefenan di ELN cu te ainda ta na teritorio Cubano, a pesar di tin un circular cora di Interpol.
“E diferencia cu Cuba ta grandi cu relacion cu e teroristanan di ELN cu tin den nan poder, cu circular cora di Interpol, e diferencia cu nos tin pa e solicitud di un hues di extradicion. E diferencianan ta hopi fuerte, e diferencianan semper tin consecuencia, pero mester mira con ta administra diferencianan”, Carlos Holmes Trujillo, canciyer Colombiano a bisa prome cu e reunion finalisa.
Na teritorio Cubano ta permanece Nicolás Rodríguez Bautista, alias Gabino, y Israel Ramírez Pineda, alias Pablo Beltrán, dos hefe negociado di ELN cu Gobierno Colombiano, hunto cu otro miembronan di e delegacion di paz di e guerrilla.
Ta importante menciona cu e mesa di dialogo cu ELN a ser instala na 2016 durante e Gobierno di Juan Manuel Santos y cu aunke tabatin hopi dificultad pa manten’e y tambe oposicion di e candidato na e momentonan ey Ivan Duque, cu awe ta presidente di Colombia, a lanta di manera definitivo na januari di e aña aki, despues cu e guerrilla a comete un acto terorista cu a laga 21 polis morto y mas di 60 persona herida ora un auto bomba a explota contra scol di cadete di Polis di Bogota.
