Durante e siman aki Bon Dia a trece dilanti e noticia cu caso di Partido Democracia Real (PDR) ta ainda den proceso. Despues di contacto cu e grupo nobo cu ta den conflicto, pa asina sa cua di e gruponan ta e directiva real di e partido, a haya reaccion di Andin Bikker kende segun registro di Camara di Comercio (KvK) ta e presidente actual di e organisacion.
Den un reaccion pa nos redaccion, sr. Bikker ta bisa cu e ta para ariba cu e grupo, kende e ta referi na nan manera ‘outsiders di cinco hende’ no tin base legal pa actua. No obstante esaki, e ta verifica cu tin un caso andando, a cuminsa cu un ‘bodemprocedure’ y cu di berdad Camara di Comercio lo mester entrega nan version y/of motivacion pa kico a nenga e inscripcion di e grupo nobo. Sr. Bikker ta pone enfasis cu no tin niun decision tuma ainda y cu no tin fecha ainda pa e caso aki wordo trata den corte.
E politico ta sigui splica cu e intencion ta locual nan a splica caba, esta cu PDR ta wordo incorpora den e plataforma nobo di POR y lo bay eleccion 2017 bou di un solo nomber. Na e momento aki oficialmente sr. Bikker ta representa fraccion di PDR den parlamento ya cu ta cu e partido aki el a bay eleccion di 2013.
Reaccion KvK
Na un forma corto riba pregunta di Bon Dia pa loke ta trata e caso di PDR, e presidente di KvK Ernst Mohamed ta bisa cu na e momento aki nan no por duna niun comentario riba e caso aki. E presidente ta confirma cu nan lo mester duna nan banda di medaya na corte pero mas cu esaki no por bisa.
Cu e situacion aki, faltando algun luna prome cu eleccion parlamentario 2017, no ta cla si e partido lo participa na e eleccion y si esaki lo ta cu un lider nobo. Tampoco no ta mucho cla ainda ki tempo corte lo trata e caso y si esaki lo ta na tempo prome cu september 22. Mientras tanto a comprende for di e grupo nobo cu nan tin algun candidato cla pa lansa nan mes y cu nan ta wordo pidi pa no rindi ya cu tin sostenedonan lo kier wak e partido continua.
