– Directorado di Colegio EPI a habri scol diahuebs ultimo y a opta pa cueste loque cueste pone e scol funciona sin liderazgo pa docente- y studiantenan. Directiva di SIMAR ta cuestiona e forma di procede aki mirando tur e problema y insiguridad cu el a trece cune. Laga nos no lubida cu ta trata di 4 scol riba nan mes consistiendo di cada un mas o menos 500 studiante y 35 docente. EPI na e momento aki ta sin un director general y sin nan managernan, ademas Directorado consistiendo actualmente solamente di Sra. Ankie Danker y Sra. Iraika Yanez, ta pretende cu tur cos ta canando nechi den e institucion mientras cu esaki obviamente no ta e caso.
SIMAR ta na haltura cu tin un lista largo di iregularidad cu a surgi y ta preocupa pa e calidad di enseñansa, bienestar di e docentenan y mas cu claro di e studiantenan.
Directiva a tuma nota cu entre otro e roosternan no ta cuadra, constelacion di klasnan no ta responsabel y no ta forma segun acuerdonan haci na final di aña escolar pasa. Esaki ta encera cu a pone studiantenan cu tin problema cu otro hunto den klas y asina por pone nan mes y e otronan den peliger. Listanan di alumno no ta cuadra cu realidad, incluso nombernan di studiantenan cu ya a gradua ta aparece riba lista y otronan cu mester ripiti aña ta riba lista di klas mas halto. Tambe acuerdonan haci entre manager- y docentenan pa loke ta trata nan ocupacion no a ser honra. Incluso tin docente cu a haya rooster cu ta core di 7:30 am pa 5:15 pm sin pauze, cual ta inaceptabel. Hasta tin docente cu no ta empleado mas di EPI cu ta aparece riba e rooster cu consecuencia cu les ta cay afo. Tur e puntonan menciona y hopi mas a pone cu e situacion a bira tenso y presion ta cay riba e docentenan. Esaki ta crea un desbalansa grandi y ta pone cu maske nan no ta nenga di duna les, esakinan no por tuma luga como debe ser. Docentenan di tur Unidad a mustra Directorado riba e puntonan aki y esnan di Unidad Hospitalidad y Turismo a mustra nan mal contento y desacuerdo vociferando cu nan lo no traha cu e rooster cu a entrega na nan.
Contrario na loke Directorado di EPI a publica riba facebookpage di EPI bou di anuncio na studiantenan cu scol lo ta cera diahuebs y diabierna, docentenan di e Unidad aki ta abstene completamente di haci tarea di managernan, cual ta di bay traha riba cambionan di e rooster. SIMAR ta haya cu esaki ta contradeci e intencion primordial di Directorado, cual tabata di habri e scol pa evita cu e studiantenan lo a perde les y ta demostra claramente cu e presencia di e managernan ta un necesidad.
SIMAR ta di opinion cu Directorado di EPI por a opta pa hinca e energia cu nan a hinca den habri e scol na e forma aki, den busca solucion hunto cu e managernan di cada Unidad. Nan por a admiti pa bienestar di EPI cu e managernan, incluyendo e di tres, cual ta e peticion di e managernan ta di vital importancia funcionamento di e organisacion.
Banda di tur esaki SIMAR ta cuestiona e silencio di Inspeccion di Enseñansa y di Director di Dienst Publieke Scholen. Semper a bin ta exigi cu mester tin por lo menos un manager na pia di trabou, mientras cu actualmente no tin ningun manager presente desde e prome dia di scol, no ta scucha niun reaccion di Sr. Hessels y Sr. Kock.
Directiva di SIMAR ta preocupa ya cu e derecho di e studiante riba enseñansa di calidad ta ser nenga.
Managernan keto bay ta den accion. Pa loke ta negociacionnan, SIMAR a propone na Minister pa dune un presentacion di importancia di e tarea y rol di e tres Managernan pa cada Unit di EPI. Lastimamente Minister a opta pa keda riba su punto. SIMAR a haci un ultimo intento cu un contraproposicion riba cual ta wardando reaccion. SIMAR ta di opinion cu e solucion ta den man di Minister di Enseñansa.
Mientras tanto SIMAR a ser poni na haltura cu studiantenan di tur e 4 Unidadnan ta disgusta y lo marcha hunto (cu scol habri of cera) diabierna mainta pa manifesta nan malcontento na Directorado di EPI.
