Manera e Hulandesnan sa bisa, e periodo aki ta supuestamente ‘komkommertijd’, un periodo cu poco actividad y noticia politico. Pero nos por ripara cu esey absolutamente no ta e caso. No cu tur hende t’ey y ta trahando. Parlamento ta cu reces y varios parlamentario lo no ta ni na Aruba, pa un descanso ‘bon mereci’. Pero e realidad ta otro. Tin hopi asunto importante pa atende, y ta miho paga bon tino.

Por ehemplo, lo mester percura pa nos tin un presupuesto cla pa presenta na parlamento dia 1 di september. Y si un ley mester bay parlamento, e mester a pasa henter e proceso prome cu yega ey, manera Raad van Advies. Pero e no ta solamente un problema di planea tempo, e desafio mas grandi ta e contenido, unda mester tene cuenta cu tur e rekisitonan cu tin stipula den e protocol firma cu Hulanda na november aña pasa. Esey ta inclui por ehemplo percura pa e gastonan di personal ta keda dentro di e limitenan stipula. Aki ta surgi un prome punto di diferencia di opinion, unda interpretacion di CAft ta cu e gastonan di personal di e Plan di Crisis Social mester cay bao di e norma palabra pa gasto di personal.

Pero talbes e problema mas urgente pa atende ta e situacion cu nos a keda aden despues di e ultimo deliberacion den Conseho di Ministro di Reino, unda nos prome minister ta bisa cu “aquí no pasó nada”, mientras e zonidonan cu nos ta capta di Den Haag ta cu tin un tormenta ta biniendo den nos direccion. Gobierno di Aruba lo a haya te fin di e periodo di vacacion aki pa remedia loke a daña pa loke ta e acuerdonan pa cambio den e ley di supervision. Y si esaki no sucede, anto Hulanda lo sa di tuma e pasonan cu nan ta kere necesario pa restitui supervision. Den e situacion aki, keda sin haci nada ta un opcion real, pero cu su consecuencianan. E consecuencia por ta cu ta bin medida pa cumpli cu e austerisacion cu Hulanda kier mira realisa, banda di e aumento di entrada cu lo mester haya forma cu e introduccion di e reforma fiscal. Cu e ultimo aki ta parce cu nos a toca un tema delicado. Mientras cu CAft y gobierno Hulandes kier mira claridad den e asunto di reforma fiscal, ta parce cu no por duna claridad pasobra… no tin claridad. Manera comenta anteriormente, aki no ta cuestion di eligi un opcion bunita y ta pone un banda esunnan mahos. Tur medida fiscal na cierto manera ta afecta e ciudadano y nan no ta aprecia esey. Mientras tanto, keda sin entrega algo na e partnernan di e supervision no ta yuda pa drecha e ambiente tampoco; nan no ta acepta.

Otro asunto urgente pa atende ta e proyecto pa resolve e problema di desperdicio. No tabatin, sorpresivamente, ningun interesado pa inscribi pa e proyecto y consecuentemente mester a cancela esaki. Inmediatamente a surgi e debate tocante e siguiente paso, cu pa e mandatario lo ta e acercamento individual di cierto di e companianan cu a mustra interes pero cu finalmente no a entrega oferta. Nos lo haya seguidamente un acercamento individual di compania cu tabata den contacto, pa mira si por logra algo toch. Nos no por visualisa awor aki kico lo por ta e resultado positivo di esaki, si aparentemente ningun compania a mira beneficio di entrega algo. Si a pesar di esey awor si nan ta bay di acuerdo pa entrega algo, ta pasobra algo a cambia? A cambia algo den e condicionnan general cu awor si e ta bira comercialmente atractivo pa ofrece un plan, cu e perspectiva pa bay traha y gana placa cu e proyecto? Ta bira importante anto pa tambe den e fase aki conta cu transparencia, sigur pasobra ta trata di un proceso bao man.

A capta nos atencion tambe e discusion cu a surgi si e proyecto di incinerator ta un BOO (Build, Own, Operate) ta un ‘PPP’(Public-Private Partnership), si of no. Nos ta kere cu e contesta por ta bastante simpel: tur BOO ta un PPP, pero no tur PPP ta un BOO. E diferencia importante den e caso aki ta cu den un BOO, manera den e caso aki ta parce e idea, despues di tempo e compania no ta pasa e actividad o propiedad pa e partner publico, loke si ta e caso cu cierto proyecto, manera e Green Corridor unda despues di un periodo e ta pasa pa e partner publico. Riba e punto ey e mandatario tin rason, pero tin mas aspecto pa contempla. E idea ta cu hunto cu e partner publico ta stipula e limitenan di e elementonan cu cual e compania por gana placa. Den caso cu, manera a resulta un problema den varios pais caba, e beneficionan di bende energia no ta resulta asina faborabel, kico ta e siguiente paso? Lo por yega na un situacion unda e partner publico ta bay haci concesion (financiero) pa haci e business deal mas atractivo? Y esaki lo por ta cu e BOO ta bira un BOOT (Build, Own,Operate and Transfer)? Poni den palabra simpel: si e proyecto fracasa, nos ta keda cu e ‘monkey’?