Temporada di turtuga Driekel of Leatherback esun di mas grandi di 7 especie di turtuga marino na mundo ta bay cuminsa trempan den Caribe e aña aki, unda ya caba na Merca nan a cuminsa haci nan neishinan y pone webo, sinembargo, esaki tambe ta depende en gran parti di e comportacion humano.
Manera ta conoci, varios especie di turtuga marino ta bin na Aruba pa traha nan neishi, nan ta bin den temporada specifico, semper ta cuminsa despues di carnaval na luna di maart te luna di juli. E prome cu ta bin esun di nan mas grandi cu ta e Leatherback Sea Turtle, na Aruba conoci como “Driekel” y despues ta bin Hawksbill Turtle cu por traha neishi te cu luna di november.
Turtuganan ta un especie protegi na nivel internacional for di aña 1990, basa riba e Cartagena Convention e cual ta un tratado internacional cu ta proteha bida marino y den particular e bida migratorio (especienan cu ta landa di un pais pa otro).
E peligernan mas grandi pa e turtuganan ta e costanan cu a ser desaroya, pa motibo cu e turtuganan ta busca e luz artificial di anochi, e ta un animal cu ta bin pa traha su neishi den oranan di anochi y e kier un beach cu ta scur, esey ta un problema cu cada aña ta bira mas dificil pa haya, no na Aruba so, na henter mundo.
Otro peliger cu e turtuganan ta enfrenta ta e botonan y jet ski cu ta den lama, e turtuganan mester subi riba e superficie pa nan por hala rosea, na e momentonan aki hopi di nan ta muri pa via di jet ski y botonan cu ta pasa rond sin ripara cu tin turtuga cerca di nan.
E temporada pa e turtuga traha neishi ta di maart te juli, e turtuga muhe ta subi riba tera y ta busca e luga mas adecua pa traha su neishi, ta hopi importante pa e personanan sa cu den e fase aki no mester stroba e turtuga, pa motibo cu nan lo por back den awa sin pone e webonan.
Desaroyo di e costa cu ta creciendo cada aña pa via di compania di construccion tambe ta un peliger pa turtuganan pa motibo cu nan ta traha hotel of condominio cu luz riba e beach.
Ta p’esey cu si ta yega di mira un turtuga cerca di e beach den oranan di anochi pa tene na cuenta cu no mag di cende luz pa nan, ni saca potret cu flash y yama instancia concerni, den e caso aki TurtugAruba.
