Temporada di transparencia y integridad a cuminsa atrobe…

Palabranan caro ta cay atrobe; ta obvio cu reces a yega su fin y e batayanan politico di tur dia ta cuminsa atrobe. Riba su mes nada straño, e ta sucede na tur pais. Lastima si cu e temanan no a cambia y e politiconan, tanto den gobierno como esnan den oposicion, kier haci nos kere cu ta nan tin e cualidad grandi di ta integro y transparente. Nos por scucha o tende e argumentonan di ambos banda, y trata na saca afo loke lo ta berdad of no. Manera semper, hecho ta papia. Manera den e caso actual di e posicion di director di Refineria di Aruba cu segun cu ta resulta awor, e parlamentario di oposicion concerni tabatin o tin cu e compania.

E contracto ta un hecho, esey e persona mes ta confirma, pero segun e ta argumenta, tempo cu el a bira ministro di asunto economico, el a renuncia e puesto. Nos prome minister, cu a bira aparentemente vocero di e compania estatal, ta duda si e renuncia a tuma luga formalmente, y tin temor, como bon hurista, cu den caso di efectua e retiro di forma regular, es decir a traves di un decision di e asamblea di accionista di RdA, lo por sigui e claim contratual cu por costa nos un par di miyon florin, si honra e pago di cinco aña di salario. A proposito, prome minister ta bisa cu e ta bay costa gobierno tanto placa, pero ta mas probabel cu e compania ta haya e golpi financiero y ta saca esaki  despues riba e consumidor, cu ta… anos, no gobierno. Nos por supone cu pago di e director di Utilities cu a haya su retiro a traves di corte recientemente, cu tambe ta un balente suma, tambe ta afecta balance sheet di Utilities y no di gobierno. Nos lo no por mira esaki den e prijs di awa y coriente, pero nos por ta sigur cu ta eyden e lo ta.

Di otro banda, nos por comprende e indignacion di e prome mandatario, pasobra compara por ehemplo cu e areglo di retiro di e ex director di Utilities, e areglo di ‘despedida’ aki ta totalmente fuera di proporcion. Si un areglo di retiro den otro casonan recien a costa alrededor di mita miyon, uno di un par di miyon florin ta totalmente exorbitante. Nos por considera esaki tambe como un hecho… Aki no ta yuda cu e actual parlamentario ta bisa cu nunca a efectua e contracto, e mero hecho cu hende tin e osadia di beneficia nan mes di e manera aki ta papia pa su mes. Y ta esaki ta e cosnan cu mester caba. Y con nan ta caba?

Masha simpel, dia cuminsa practica e bunita palabranan tan uza den e dianan aki: transparencia y integridad. Den e contexto aki ta bon cu e actual gobierno, y na prome luga e companianan estatal mes, ta busca pa haya sa kico otro huntanan di comisario a haci cu e pida propiedad di Pais Aruba aki, pasobra ta esey e ta y mester duna cuenta na Pais Aruba. Y si tin asunto di denuncia, haci esey; e no tin nada di haci cu persecucion politico. Esun cu no kier esey, no tuma posicion publico y maneha esaki di tal manera, cu esun cu ta sigui bo ta bin topa cu cos cu no por. Pero, e storia no a caba aki ainda, pasobra gobernacion ta sigui. Y si abo como gobierno di e momento aki ta haya cu den pasado recien a haci uso di scuridad pa comete cos indebido, no denuncia esaki so… conta nos de paso kico ta bay haci pa remedia esaki, asina cu e probabilidad cu e ta bolbe sucede ta bira hopi mas chikito. Y den e sentido aki, loke mester haci ta ‘practice what you preach’. Bo antecesornan no a actua corectamente, denuncia nan y conta nos kico ta bay drecha den e practica interno di e companianan aki, pa preveni ripiticion. Y esaki den tur detaye y publicamente. Di biaha ta cumpli cu e deseo di hopi ciudadano pa e propiedadnan di Pais Aruba aki, pues di nos ta publica nan cuentanan anual y tambe ta anuncia semper tur cambio cu tin na nivel di gerencia. Nos por a ripara den e caso cu nos ta discutiendo cu, asina leu cu nos conocemento ta alcansa, nunca e awe parlamentario a keda registra na Camara di Comercio, loke ta un violacion di ley. Bunita ehemplo pa comunidad. Pregunta: nos tin o tabatin mas caso di director o comisario scondi pa comunidad? Si ta asina, ban regla e cosnan na un bon manera, y esey ta introduci di un solo tiro reglamento di ‘good corporate governance’ pa tur entidad estatal. Y den esaki por cuminsa tambe cu duna comunidad e debido respet manehando e companianan estatal como ehemplo pa henter sector priva, den bista di tur hende. Esaki mester encera e profielnan pa e diferente funcionnan den hunto directiva. Y pa bolbe na e topico actual: kico ta salario y condicion di retiro pa e actual director y comisarionan di tur empresa estatal? No uza transparencia y integridad como palabra bashi, pero duna nan berdadero contenido. Esun cu por haci esaki, ta esun den e ‘driver’s seat…