Benta di klapchi ta cuminsa desde awe te cu dia 31 di december, segun a duna di conoce vocero di departamento di Bombero, Ferdinand Ponson.

Ponson a splica pa Bon Dia Aruba cu desde awe den oranan di marduga – specificamente 1or – a cuminsa saca e container cu tur mercancia di klapchi pa hiba na e luganan di benta, pa cuminsa bende desde ora cu solo sali te cu 9or di anochi dia 31 di december.

Di mesun manera, el a comenta cu ainda ta falta 8 container pa habri. Ta controla e calidad di klapchi y cua di nan no mag drenta, por ehempel, tin klapchi cu no tin mecha, cual no mag drenta y no por ta den mercado.

Ponson a bisa cu actualmente tin diferente grupo cu awe dia 27 a cuminsa sali pa controla e diferente puntonan di benta. Un di e medidanan di control ta cu e luga mester ta leu di edificionan of caminda. Tambe e puntonan di benta no mester tin mas di un pagara den container, e bendedo mester coloca un borchi pa bisa cu tin pagara y di cuanto size e tin.

Compara cu aña pasa, Ponson a splica cu ta e mesun cantidad di klapchi, diferencia cu tin un container menos. Tambe el a comenta cu ta distribui klapchi cu tabatin warda di aña 2018 y 2019 cu mester wordo bendi y nan ta cla caba pa sali.

Departamentonan encarga pa cu esaki cu ta DTI, Departamento di Polis Aruba, DOW, Brandweer y Volksgezonheid Dienst. Tambe ta recorda hende cu lo bende klapchi pa no surpasa e oranan di benta y asina no perde e permiso.

Di mesun manera, e bendedo mester tin nan permiso visibel pega den establecimento, e mester ta valido pa aña 2019. Ta prohibi pa bende klapchi pa muchanan bou di 12 aña di edad, esakinan mester ta acompaña pa un adulto. Ademas e bendedo mester tin mas di 16 aña di edad.Ta recomenda e bendedonan pa percura pa tin EHBO kit den establecimento, como tambe aparato pa paga candela. No huma cerca di establecimento di benta.

Si comunidad tin pensa celebra e yegada di aña nobo cu klapchi, mester tene na cuenta cu tin luganan cu no tin siguridad pa haci esaki, mester haci uzo di dje na un area habri, leu for di vehiculo, casnan y palo di luz.

Muchanan nunca mester hunga cu klapchi, pa motibo cu por transforma un dimension di fiesta tradicional y special den un evento peligroso, den cual hende por perde nan bida pa utilisa klapchi di un manera no corecto.