Temporada di horcan ta cuminsa: Tin posibilidad cu dos horcan lo pasa den nos zona Caribe

Director di Rampenbureau, Rino Hermans a declara na Bon Dia Aruba cu e pronostico di e temporada di horcan 2020, cu a caba di cuminsa, ta mustra hopi activo pa nos region di Caribe, compara cu aña pasa. Esaki segun pronostico cu expertonan a haci.

“Dos tin e probabilidad di pasa den loke nos ta considera nos zona cu nos ta monitorea,” el a bisa.

Algo cu ta haci e temporada di horcan aki particular ta e hecho cu nos ta den un crisis di pandemia debi na e covid-19. E situacion aki a haci cu e departamentonan concerni pa atende cu cualkier crisis, ya caba ta bin trahado intensamente pa tres luna, pa atende e pandemia localmente. Nos mester tene cuenta cu despues di un awasero, nos por confronta casonan di malesanan relaciona cu sangura, manera Dengue.

E preocupacion ta pa nos comunidad mes coopera, specialmente evitando e criadero di sangura y haciendo rond di nan cas limpi, el a bisa. Esaki ta yuda –segun Hermans– pa nos por evita di haya mas situacion molestioso pa nos comunidad. Considerando cu ainda nos no sa con e crisis di e pandemia ta wordo controla mundialmente. “Nos ta keda cu e obligacion di cuida e capacidad di nos hospital…” el a laga sa.

E pronostico ta cu normalmente hopi di e sistemanan tropical ta keda pabao di region Caribe, pero algun di nan por drenta pa afecta e islanan di nos region. E expertonan ta premira tambe cu dos di nan lo pasa den e ruta di sur Caribe, unda ta situa e islanan ABC (Aruba, Bonaire y Corsou). E no ta cos cu ta pasa cerca di nos isla.

Sinembargo el a remarca cu ainda e ta keda un pronostico di computer a base di modelonan cu por duna bo un indicacion a basa entre otro riba temperatura di awa. Asina nan ta determina e comportamento cu e sistema tropical ta bay haci durante e temporada di horcan 2020.

El a bisa cu pa Rampenbureau, nan no tene cuenta cu categoria. Pero si nan ta tene cuenta cu e cantidad di awa cu e fenomeno aki lo por ocasiona. E por ta un tormenta tropical mes, pero e lo bay influencia e mobilidad na Aruba. Eventualmente nos lo por confronta situacion di inundacion di casnan cu ta wordo afecta pa e cantidad di awa.