Ayera den oranan di merdia reportero di Bon Dia Aruba a haci un recorido den e diferente areanan na unda cu for di 12or di merdia campadonan a cuminsa set up e luganan na unda nan lo disfruta e Semana Santa aki, cu hopi expectativa.

“Por fin!” ta e palabra cu a wordo scucha ayera despues cu durante dos aña campamento a wordo suspendi pa motibo di pandemia di Covid-19 y cu aworaki tanto personanan local como turista por disfruta di varios dia di vakantie na lama.

Durante e recorido, por a mira cu na Bushiri ya caba tabatin diferente trailernan poni, di mesun manera na Eagle, Boca Catalina y Arashi, e parti cu te ainda no tabatin hopi movecion te ayera merdia tabata Fisherman’s Hut na unda cu algun campadonan te ainda no a haya nan permiso pa campa den areanan aki.

Aunke prome minister Evelyn Wever-Croes a señala den un conferencia di prensa dia 28 di maart ultimo, “situacion di COVID ta bayendo bon ainda y ta duna posibilidad pa bay campa, por fin”. Sinembargo, Cuerpo di Polis e entidad cu ta encarga pa duna e permisonan pa por campa, ainda no a duna e permiso pa esunnan cu kier campa na Fisherman’s Hut.

Temporada di campamento, ta e unico momento den aña cu Arubiano por scapa di su rutina y por disfruta di dianan di vakantie, unda den dianan aki ta demostra e hermandad cu ta existi pa comunidad bin hunto y disfruta di e beachnan di Aruba, semper cu e responsabilidad pa cuida naturalesa, pa mantene e beachnan limpi y no haci algo cu por causa un daño na e luga.

Bon Dia Aruba a consulta cu un campado e cual su nomber lo keda anonimo unda el a menciona cu e ta considera campamento algo importante tambe pa turismo y pa e desaroyo economico di Aruba cu na e momentonan aki mester tene na cuenta cune mirando e pasonan di recuperacion economico cu ta tumando luga na Aruba despues di pandemia.

“Nos ta organisa hopi bon, nunca nos a haya un reclamo of un boet pa algo, nos ta mantene e area limpi, nos ta busca nos luga pa pone e bañonan, unda nos lo cushina y asina ey nos ta mantene nos luga pa e tempo aki, tambe turistanan ta bin pa comparti cu nos te hasta nan a yega di come pisca fresco cu nos a yega di prepara, nan ta  gosa di e tradicion aki unda cu nos ta espera cu esey lo por continua e aña aki, pa asina yuda nos turismo y economia”, el a finalisa.

Na Malmok redactor di Bon Dia Aruba a topa cu un trailer y un campado di nomber Marvin Weverik e cual a expresa cu ayera nan a yega banda di 12or pa cuminsa set up pa asina nan por campa pa dos siman, “por fin, a mi cu mi casa y su famia tin 30 aña campando akinan y nos ta sinti falta hopi di esaki, caminda nos ta akinan na Malmok e awa ta dushi y esey ta algo cu a nos semper a gusta”, el a bisa.

El a menciona tambe cu el a mira basta movecion di campamento for di Savaneta cu e ta luga na unda e ta biba cu su famia “full e ruta nos a wak cu ta yen caba”.

Pa loke ta trata e costo, el a trece dilanti cu e aña aki e prijsnan ta diferente “akinan loke nos a gasta ta e awa, bateria y anochi nos ta cende e generator pa airco, pero awor gasolin ta caro y e ora ey si bo ta bay sinti e efecto un tiki mas pero e ta bale la pena”, el a sigura.

Na e luga aki tin aproximadamente cuater famia cu cuater trailer diferente, cu pa cada aña nan ta bin campa cu un total di entre 15 pa 20 persona.

Den un comunicado di prensa di Cuerpo di Polis di Aruba nan a señala cu e ultimo dia di campa lo ta dia 24 april 2022.

Despues di campamento tur obheto mester wordo kita for di beachnan, si esaki no lo tuma luga, polis lo kita esakinan riba gasto di e campado. “Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic”, nan a finalisa.