ORANJESTAD – E temporada di campamento di e aña aki a finalisa ayera. El a caba cu hopi exito y sin problema, e persona cu a dicidi di keda cerca di lama den dianan aki a pasa un siman dushi, pero ainda nan tin e expectativa si esaki lo bay pasa otro aña.
Bon Dia Aruba a tuma contacto cu sr. Pepi Oduber, kende tin mas di 15 aña campando na area di Fisherman’s Hut. el a splica cu nunca el a haya problema cu niun di su bisiña di campamento, pa via cu nan conoce otro pa hopi aña caba. Tampoco cu autoridadnan of departamentonan concerni, cu ta pendiente di e hende cu ta campando, nan a bishita varios biaha su luganan, pero tur cos a bay bon.
Oduber a sigura cu nan ta un grupo uni y p’esey nan no lo kier perde e luga, tampoco pa via di e verkabeling cu aworaki ta existi na area di Bushiri, y si esey lo yega pasa, el a manifesta cu no lo bay haci campamento mas. Segun Oduber na e area ey mester tin un tiki mas di organisacion, pa motibo cu nan tin trailer un riba otro, y esey e mesun turistanan a haya un tiki mahos pa e isla.
E area di e beach di Fisherman’s Hut e aña aki no tabatin hopi trailer, pero manera el a expresa, ‘e parti ey tambe ta bon’. E diferencia cu tin desde varios aña pasa cu aworaki ta e botonan cu ta baha na area aki, y pa via di nan, e area di lama a haya hopi daño.
Oduber a bisa cu e tradicion di campamento ta na expectativa, pa motibo cu si Gobierno tin den su plannan e construccion di un ‘Linear Park’, tur e area di campamento lo por perde. “Nan ta bay tira tur cos abou y nos no lo por campa mas, pero e tradicion di e Arubiano mes ta sigui”, el a expresa.
Temporada di campamento, segun Oduber a expresa pa Bon Dia Aruba, ta e unico momento den aña cu e Arubiano por scapa di su rutina y por disfruta di dianan di vakantie, manera el a comenta: “Den dianan aki nos ta demostra e hermandad cu ta existi pa nos comunidad di campamento”.
