Temporada di biahamento a cuminsa, o nunca a caba?

Den un carta dirigi na Tweede Kamer, secretario di estado Knops ta informa e parlamentarionan cu e situacion financiero di gobierno di Aruba ta duna keto bay “reden tot grote zorg” y esey a pesar di un turismo cu ta florece y un economia cu ta creciendo atrobe – moderadamente – y un confiansa di consumidor cu ta mehorando cautelosamente. Mientras lo tin entre nos, persona cu ta mira e asunto diferente cu e secretario di estado, ningun di nos probablemente lo tin duda tocante e gran preocupacion di e politico Hulandes.

Mientras tanto, sin embargo, ta parce cu cerca nos gobernantenan mes tur mata ta crece te den cielo ainda, pasobra nos no ta mira nada ta mengua den e afan di… biaha. Cuanto delegacion parlamentario nos a mira bay Hulanda of otro destino den e apenas cuatro luna cu a transcuri di e aña aki? Anto no un par di hende, sino delegacion ‘pisa’ pa por haci, aparentemente, un trabao serio di ‘convence hende’. Asina algun tempo pasa a bay henter un delegacion, cu hasta por a conta cu participacion di lider di fraccion opositor, pa bay lobby na Hulanda y Bruselas pa haya placa pa combati gasto di refugiado. Ora nos a tende di e bishita na Bruselas unda parlamentario ta pretende di haci trabao di ehecutivo nos a keda keto prome, den asombro y pendiente pa nan haya tende kico ta kico den e mundo bon organisa di Union Europeo ey. Pero no, nos apreciabel delegadonan a bolbe cu e grato noticia cu nos ta bay haya miyones pa atende refugiado. Despues ta bin resulta cu e miyones ta pa atende henter region cu problema di refugiado Venezolano…, y no solamente Aruba. Ademas, manera tabata di spera, a haya e mensahe cu nan ta deal cu ehecutivo y no cu parlamentario, y cu lo ta bon pa bisa gobierno pa entrega nan plan. A bira keto despues…

Den e dianan aki, atrobe otro delegacion pisa pa bay sinta den background di Tweede Kamer pa scucha debate. Tambe e asunto di e famoso areglo di conflicto a bin dilanti, unda e tres islanan ta para diametralmente contra gobierno Hulandes, cu tin su problemanan cu e opinion den parlamento, unda tin un ambiente mas faborabel pa e posicion di e islanan, cu ta desea un instancia independiente, cu ta duna un veredicto definitivo y imperativo, cu cual gobierno di Reino/Hulanda mester cumpli. Ta di comprende cu, despues cu tanto aña pasa cu a bay di acuerdo cu un areglo di conflicto asina, gobierno Hulandes a cuminsa haya ‘cold feet’ y ta prefera di mantene e posicion di poder actual.

Ta parce nos cu den e caso aki no ta cuestion di tin rason, sino e pregunta con bo ta hay’e. Di otro banda, henter e asunto aki ta algo cu mester regla situacion unda gobierno di Reino ta interveni den gobernacion di un isla, y ki ora nan ta haci esey? Si un gobierno di un di e tres islanan ta goberna manera mester ta nan no ta haya nan mes confronta cu e tipo di situacion aki. Es decir, goberna drechi, cumpli cu tur e bunita plannan cu tin pa promove integridad y bon gobernacion, y bo no ta haya bo den e situacion cu bo mester purba baha Reino di bo lomba. Pero enfin, e gobiernonan insular ta haya e areglo importante y kier pa Hulanda cumpli cu palabracion. E Hulandesnan mes semper ta gaba cu nan gusta cumpli cu nan palabra, pues hacie anto. Sin embargo, henter e asunto aki ta rekeri cu tin delegacion asina pisa ta biaha? Si nos situacion financiero ta asina preocupante, pakico aparentemente tur e cranchinan aki ta keda core awa? Nos a tende un nota critico di e minister encarga cu financia, cu ta adverti su coleganan cu nos mester anda cu cuidao cu tal o cual gasto, cu nos por evita? Cuanto placa a bay den e prome lunanan di aña aki caba na biahamento?

Berdad ta cu mientras na Hulanda tin preocupacion grandi, aki na Aruba nos no ta riparando nan nada cu tin medida di austeridad. Arubadag ta parce di a bira otro ‘baca sagrado’ cu cual ningun hende ta mishi, al menos, no e politiconan. Ademas tin un otro aspecto pa tuma na cuenta: cuanto trabao parlamento a haci den tur e lunanan aki? No mucho cos, ademas cu ta dificil pa evalua esey pasobra e website di parlamento ta un desastre ainda, unda awendia no por ni haya e documentonan di e leynan ya aproba pa parlamento. Dilanti nos ta bay asina? Pa loke ta e trabao, dede di un man ta sobra pa conta loke a trata den e cuatro lunanan aki.

E pregunta grandi sin embargo no ta, cuanto a gasta. Esey ta: cuanto a logra? Y cuanto no a logra pasobra ta dedica tanto tempo y placa na cos secundario, mientras e tareanan principal aki na Aruba mes ta haya menos atencion. Asina ultimamente a presenta un plan economico, pero con bo kier pa hende duna opinion faborabel, si ta e mero ‘outline’nan di e plan a mira. No ta mira contenido, no ta mira e plan mes. Miedo pa critica?