E conflicto den seno di gobierno a trece algun aspecto interesante dilanti cu merece atencion, independiente di e resultado di e conflicto mes. Un di nan ta e problema cu a surgi cu e proyecto di hotel na Bubali, cu segun ministro encarga cu Turismo no ta cuadra cu su maneho. Aunke su punto di bista ta valido mirando e importancia di mantene un solo politica pa cu desaroyo di hotel, e ministro aki den su funcion no tin e decision final den esaki.
Nos sistema legal anticua ta rekeri un compania cu ta desea di opera un hotel, pa e cana e siguiente caminda: e compania (NV, por ehemplo) tin su permiso di Asunto Economico pa opera en general. Despues mester un permiso pa construi e facilidadnan, si esey ta e caso. Si ta trata di tereno publico, mester haci e tramitenan pa haya e tereno como erfpacht, cu ta prerogativo di ministro encarga cu Infrastructura, cu ta otorga permiso pa construi tambe. Si esey ta regla, anto bao di e ‘Vergunningsverordening’ ( Decreto pa Permiso)e compania mester haya su permiso pa opera e hotel. Kico den practica ta e problemanan cu ta surgi?
Laga nos supone cu desde e prome momento ta conoci cerca henter e gabinete cu un cierto compania ta desea di opera un hotel, di cierto tamaño y cierto caracter, na un cierto localidad. Si no tin interes personal di ningun ministro envolvi, y en principio esey nos ta tuma como punto di salida, lo no ta normal cu e ministronan ta sinta hunto y ta tuma un decision sensato, a base di bienestar general? Y no ta laga e asunto den man exclusivamente di esnan cu tin e pen den nan man pa firma pa un of mas permiso? Aki nos ta yega na un punto unda ley anticua ta hunga un papel. Aparte di e permisonan pa adkiri tereno publico y pa construi, e operador lo mester un permiso bao di e Decreto pa permiso menciona, cual ta cay bao di responsabilidad di e ministro encarga cu Salubridad Publico. Y pakico esey? Pasobra tanto aña pasa cu e ley a bin na vigor, e aspecto di higiena y otro asunto relaciona cu Salubridad Publico tabatin e enfasis den controla operacion di un hotel, mescos cu un bar of restaurant.
Aña 2016 nos mester reconoce cu e situacion a cambia drasticamente y cu maneho di sector hotelero como sector economico primordial merece atencion y prioridad. E surgimento di e proyecto di ley pa regula e modelo di opera conoci como all-inclusive ta muestra di esey, pero talbes no ta abarca tur cos. Nos no tabatin e dicha pa haya un copia di e proposicion di ley ainda, asina ta cu no ta posibel duna un opinion tocante su contenido.
Pero, talbes lo ta miho idea ainda pa cuminsa modernisa nos legislacion economico di un manera mas drastico. Por ehemplo, creando un ley general di maneho di hoteleria, cu ta duna e posibilidad di maneha e tipo di hotel cu ta deseabel, dependiendo di e relacion tambe cu economia den su totalidad. Banda di esaki ta keda den man di Salubridad Publico e instrumentonan legal pa control di higiena, etc. den hotel, mescos cu den otro establecimento. En todo caso, no tin un motibo valido pa e ministro encarga cu Salubridad Publico ta dicidi si un hotel por opera si of no, pa loke ta e otro aspectonan.
Prome cu tur cos, y tanten no tin ley nobo pa regla e asuntonan aki miho, lo ta bon pa gobierno demostra cu di berdad nan ta opera como ekipo, y no como ministro riba nan mes. Esey ta rekeri cu tempran den e proceso conhuntamente ta atende e peticion pa un cierto hotel. Esey ta logico, pasobra si unabes a otorga e tereno, no ta logico mas cu e siguiente ministro ta bay para e asunto, pasobra simplemente e tin e potestad pa haci esey. Igualmente tambe ta logico cu no ta otorga tereno, sin cu tin un claridad cu e otro carteranan envolvi ta na altura y ta bay di acuerdo cu e proyecto den su totalidad y den tur aspecto. E ora tambe conseho di ministro por ta transparente cu comunidad y anuncia cu tal proyecto ta bay bin, cu ta cuadra cu maneho stipula pa e sector aki, y cu otorgamento di e demas permisonan ta depende solamente di e normanan stipula pa cumplimento cu e permiso. Ehemplo: bo por tin un permiso pa construi, pero esey no ta kita cu mester cumpli cu e rekisitonan tecnico pa cu construccion, entre otro normanan di siguridad encuanto electricidad, peligro di candela, etc.
Con tal cu e situacion actual unda aparentemente e man drechi no sa kico e man robes ta haci, no por continua. No pasobra e ta trece discordia entre colega ministro, pero pasobra e ta afecta bienestar general. Y manera bisa caba, si un ministro semper ta traha no liga na interes (financiero) personal, kico ta nan problema pa discuti e cosnan aki manera hende adulto? Ta p’esey nan t’ey.
