E acercamento cu e partido den gobierno ta parce di ta scoge den campaña electoral, ta haci nos corda e chiste di e mucha homber Brasileño cu ta masha orguyoso di tamaño di su pais, y algun cos mas. Ora e mester a yena su carchi di inmigracion di e pais unda e tabata bay, el a yena nomber, fam y fecha di nacemento. Ora el a yega na e item ‘sexo’, e no a vacila pa pone: “o mais grande do mundo…”

E partido actualmente den gobierno ta bira recalcitrante pa cualkier asunto cu nan ta kere cu por stroba nan di presenta nan mes como e partido cu (hopi) mas apoyo popular actualmente. Den esaki tanto respet pa Conseho Electoral y pa e puesto di responsabilidad cu e lider di partido mes tin como representante di nos tur, a keda poni un banda pa duna prioridad na e impresion cu mester a crea cu e partido aki tin e apoyo mas grandi den masa, presente na e entrega di lista di candidato.

E lider berde a pronuncia su teoria cu segun e, rabo di nan parada tabata na Banco di Caribe ainda ora e mes a yega Censo caba. Social media por ta un instrumento interesante, pero por ta un arma mortal tambe ora otronan tambe ta haci uzo di e medionan moderno aki. Material fotografico saca na e luga den un rato tabata duna indicacion cu e multitud cu a acompaña e dos partidonan grandi na nan yegada na Censo, no ta diferencia tanto den tamaño. Ta na cada ken pa saca conclusion ta ‘di ken ta mas grandi’.

Ademas como medio di comunicacion nos no ta bay mete den e eventual polemica cu e prueba fotografico ta significa. Igualmente nos no ta confia encuesta pa premira resultado di eleccion y nos no tin un bola di cristal den oficina tampoco. Loke si tur partido por keda conta cu ne, ta un acercamento critico di tur loke ta sucede den politica. Den esey necesariamente mayor parti di critica ta cay riba esun cu ta na timon di e pais, pasobra ta esey ta esun cu por, y mester actua. Cu esey lo no ta na agrado di nan, esey ta e menor di nos preocupacionnan. Laga nos purba tene un bista realistico riba e acontecimentonan manera nan ta tumando luga y reporta riba esaki.

Pa e motibo aki, e resultado di e confrontacion di partido den parada, cu enfasis riba ken a logra acumula mas hende pa acompaña e lidernan pa bay entrega lista, no ta di relevancia primordial. Loke ta parce nos mas relevante ta ken ta riba e listanan y kico por spera di nan den termino di atrae votado pa e partidonan. No cabe duda cu den e eleccion di otro luna tin tres partido cu lo resalta. Esey ta e partido actualmente den gobierno, y e partido grandi den oposicion, mas e partido nobo POR cu ta reuni tanto hende nobo como un man yen di politico experimenta y cu cierto apoyo di nan mes. Loke ta remarcabel riba e lista di partido den gobierno ta cu parti di e actual miembronan di parlamento a haya un posicion cu ta pone nan den desbentaha, hasta si e partido gana eleccion cu mayoria absoluto y forma un gobierno atrobe di nuebe ministro. Esun posiciona mas faborablemente ta Melvin Wyatt Ras, na di seis luga. Jennifer Arends Reyes na di 10 luga tambe ta mantene un luga prominente. Otronan cu ta relativamente halto ainda ta Marlon Sneek, Melvin Tromp, Desiree Croes y Clarisca Velasquez. Pero Rene Herdé, Chris Dammers, Donny Rasmijn y Jeffrey Kelly a keda den posicion cu no ta duna perspectiva pa bolbe den parlamento. A duna prioridad na caranan nobo, manera e introduccion den posicion halto di candidato Robert Candelaria cu mester bay reemplasa e actual ministro di Husticia, si e partido bolbe den gobierno, segun e lider. Con cu bo kier bira e asunto, un ‘brevet van onvermogen’ pa e actual ministro.

Riba lista di partido MEP manera tabata di spera e actual representantenan den parlamento ta encabesa e lista, cu excepcion di Ady Thijsen cu a baha di number 5 (2013) pa number 13. A duna prioridad na algun cara nobo, manera ex-presidente di Camara di Comercio Daphne Lejuez. Tambe e sorpresa cu ta e actual director di KIA, Rocco Tjon. Lista di partido POR ya pa gran parti tabata conoci caba, loke ta bon. E tres partidonan cu probablemente ta bay hunga un papel importante den parlamento y/o gobierno a haci hopi esfuerso pa bin cu candidato cu ta cubri un gama amplio di sector, loke riba su mes ta bon, ya cu riba tur e terenonan ey tin hende cu conoce e materia. Punto ta keda naturalmente cu esey no ta suficiente. Awor cu nos a caba cu e etapa aki di postula candidato, ta bira tempo pa bolbe na e debate di contenido riba e diferente temanan. Keto bay nos no a tende suficiente detaye di e plannan di e partidonan, cu algun excepcion aki aya. Y keto bay e interogante grandi pa tur ta keda: cu ki placa ta bay haci kico?