Ginelly Quandt ta un hoben di 26 aña cu ta carga e fam di un di e famia mas tradicional di Rancho. E tambe ta un Ranchero orguyoso masha comprometi cu su bario y cu su hendenan, specialmente cu e generacion nobo. E ta forma parti di e proyecto “Tempo pa Click” cu fundacion Rancho a organisa y cu awe pa 6’or atardi ta habri su exposicion na Biblioteca Nacional Aruba su sede na Playa. E fundacion aki semper ta traha pa conservacion y cultura di e bario di Rancho.
Proyecto
Ginelly ta un boluntario cu a duna su asistencia fei di principio te final na e proyecto aki cu a conta cu e participacion specialmente di muchanan y hobennan di Rancho. Pa medio di un camara nan a capta e diferente cara di e bario aki. Un bario di e mas bieu na Aruba cu un rikesa historico, cultural y arkitectonico grandi, pero cu tambe ta confronta un problematica social grandi.
Sin pretende di cay den spera negativo di e bario, pero como hoben tambe di Rancho, Ginelly ta kere cu mester bin cu programa continuo den Rancho pa evita cu e muchanan di e bario, despues di scol ta subi riba caya.
P’esey e ta sostene e proyectonan cu fundacion Rancho tin programa pa 2016. “Nos kier pa nan bin cerca nos. Nos tin proyectonan, nos tin cos pa haci. No solamente den fotografia, nos tin arte y tur otro actividad relaciona cu arte…”, el a bisa na Bon Dia Aruba.
E hoben boluntario aki tin e arte di saca potret como un hobby. El a compromete su mes cu e proyecto aki, ya cu e ta haya cu e intencion patras di esaki ta importante. E tin di haber riba kico ta e nificacion pa e bario. E ta haya relevante cu e mesun hende cu ta bibando den e bario lo por bin cu su propio nificacion pa medio di potretnan.
No tabata facil
El a bisa cu berdaderamente e proyecto aki a envolvi muchanan y hobennan di Rancho… pero no tabata facil. Nan a yega di confronta problema, un di e problema tabata ta cu nan a haci hopi esfuerso pa hala atencion di e muchanan di Rancho. “Nan ta muchanan cu principalmente ta ariba caya, pero nos kier pa nan bin. Nan a wak cu nos tin proyecto pa nan”, el a bisa.
Ginelly a bisa cu tabata dificil pa haya mucha di Rancho mes, pero nan a insisti te hasta bay riba caya y stimula nan pa forma parti di e proyecto aki, esta Tempo pa Click. Un proyecto cu ta bay mas leu cu un simpel click di e camara, sino cu ta evita cu e muchanan aki lo por cay den mal caminda.
E prome grupo tabata mucha te edad di 12 aña; y despues nan a bay pa e siguiente grupo di hoben entre 12 pa 18 aña Te hasta hende grandi tambe a keda envolvi den e proyecto aki cu ta uno di inclusion social. Mayoria di nan ta confronta problema social, ya sea cu nan ta bin fei di famia disfuncional. “Mama y tata no tin contacto cu nos, pero nos sinembargo inclui e muchanan pa bin y wak pa nos tin algo pa nan”, Ginelly a bisa.
Rancho
Esaki ta loke e fundacion Rancho su meta ta pa 2016. Esta organisa actividad y proyecto atractivo y sano pa e hobennan di e bario aki afecta entre otro pa e problematica di droga. E hoben Quandt a bisa cu e fundacion ta habri pa nan y asina nan lo por participa den tur nan proyectonan.
Nan lo bin entre otro cu tayernan di trabou di boto miniatura, un tradicion cu nan no kier pa e bay perdi. Pero pa mantene proyectonan di inclusion social den bario di Rancho, e fundacion cu ta carga e mesun nomber aki, mester di fondo. Esaki ta otro reto di fundacion Rancho pa 2016, pa proyecto manera Tempo pa Click lo por sobrevivi nan mester di un fondo di 15 mil florin pa cubri tur e gastonan envolvi.
Rancho ta un bario masha singular cu caracteristico propio, identidad propio y te hasta cu un personalidad propio. Tur e aspecto aki lo wordo observa den e expo di potret cu lo keda habri awe na Biblioteca Nacional Aruba su sede na Playa. Na final, Ginelly a bisa cu tur e trabou di e participantenan di e proyecto aki ta wordo exhibi den e expo “Tempo pa Click”.
