E devastacion cu horcan Maria a laga atras, unda el a ranca cas, infrastructura, vegetacion y ademas 16 bida humano, a cambia e caracter di e crisis riba e isla.
E pais tabata carga riba su lomba e peso di e insolvencia financiero, cu pa e momento aki ta parce di a wordo reemplasa pa e urgencia di e recuperacion necesario.
Sin embargo, ya cu e cuadro fiscal dificil no a desaparece, gobernador Ricardo Rosselló a declara ayera cu e pais ta al borde di un crisis humanitario cu mester preveni, tanto di banda di e gobierno estatal como di esun federal.
“Si nos no por percura cu e cuminda por sigui yega di manera apropia o pa nos tin acceso na fondo pa reactiva areanan cu ta infrastructura critico, manera salud, distribuicion di awa potabel,etc. anto nos ta mira nos mes hopi cerca di un crisis humanitario,” el a declara. “Loke mi ta haciendo ta un alerta na tempo.”
E gobernador a adverti diadomingo pasa cu, ademas di busca asistencia federal pa mitiga e devastacion causa pa Maria, Puerto Rico mester di ayudo financiero pa pone recuperacion y reconstruccion di e isla cana, tambe desde un optica di revitalisacion economico.
Pero presidente di Merca, Donald Trump, a bay riba Twitter pa subraya cu Puerto Rico tin un debe pa atende, cu ta hogando financia di e estado.
“Puerto Rico, cu ya tabata sufri cu un infrastructura kibra y un debe enorme, ta den problema grave. Su red di electricidad bieu, cu tabata caba den condicion teribel, ta awor devasta. Gran parti di e isla ta destrui, cu biyon di dollar na debe na Wall Street y na e banconan, algo cu tristemente nan lo mester lidia cu ne. Alimento, awa y medicina ta e prioridadnan, y esey ta funcionando,” el a skirbi.
Durante dialuna, Rosselló a recalca na varios ocasion cu e crisis fiscal ta e trasfondo di e panorama cu Puerto Rico ta enfrenta awe, cu ta un un desastre mayor.
“Mi peticion na Congreso ta cu e cantidad di e pakete di asistencia mester ta di acuerdo cu e dañonan. Nos mester ta sigur, ademas, cu lo tin flexibilidad den e financiamento aki, pasobra Puerto Rico no por opera sin e flexibilidad ey, y na tercer luga, mester tin financiamento, sea traves di e Departamento federal di Tesoro o di e Reserva Federal, pa Puerto Rico por opera,” e prome ehecutivo a enfatisa.
Rosselló a solicita ayera na gobierno federal un dispensacion pa eximi Puerto Rico di aporta e 25% rekeri pa por ricibi e ayudo di emergencia di e Administracion Federal pa Maneho di Emergencia (FEMA). “Esey lo ta pa e componentenan di infrastructura y di famia,” e gobernador a splica.
