-300x200.jpg)
Segun empleadonan di ex Señor Frogs, nan temor di mas grandi a bira realidad. 32 empleado a keda sin entrada anto desapunta cu no a cumpli cu palabra cu a duna nan. Segun informacion di Starr Ramos, kende tabata marketing manager di Señor Frogs y representante di e empleadonan: “Yen di promesa a wordo haci cu trahadonan lo haya pago en todo caso te ora cu compania declara failliet. Un suma chikito di placa a wordo manda pa paga trahadonan te cu loke nan tabata debe nan prome cu nan cera nan quincenna pa November.” Tambe belasting a bende e cosnan di Señor Frogs na findishi. Aworaki 32 persona a keda sin entreda y desapunta cu no a cumpli cu palabracionnan. Esaki ta palabracionnan cu a wordo duna y garantisa door di abogado Joselin Croes. Segun sra. Ramos, ta lamenta cu awor ta mustra cu e garantia cu a wordo duna tabata uno bashi.
Director no a presenta
Tabata november aña pasa ora cu trahadonan di Señor Frogs a uni, organisa y tuma paso pa asina protege nan derechonan despues cu e luga cera inesperadamente. Derechonan cu nan a teme cu lo wordo trapa riba dje di parti di Señor Frogs y Grupo/Operadora Anderson di Mexico. Despues cu e famoso Daniel Orosco a wordo nenga salida di Aruba, abogado Joselin Croes a presenta na nomber di Orosco y Grupo/Operadora Anderson. A wordo haci cantidad di promesa segun sra. Ramos incluyendo cu e director ta bay presenta pa asisti cu e situacion. Segun sra. Ramos: ” E ultimo palabranan di Joseline Croes no a sorprende nos. Nos tabata tin miedo di esey. Mi ta representa 32 empleadonan di un compania cu a laga nos – como hende local – cu man bashi. Hende cu ta pasando duro y cu a keda sin confiansa.” Abogado Joseline Croes a accepta Grupo Andersons Coorporate como cliente – sabiendo cu e ta bay representa y defende contra tur locual Croes mes a bisa – kier cambia den su campaña pa su carera politico segun sra. Ramos. “Y awo ta mustra cu e tabata solamente promesanan falso pa mantene e prensa calma.” sra. Ramos ta subraya.
Empleadonan sin entrada
Sra. Ramos ta splica cu e no kier pa esaki bira un tema politico pasobra esaki no ta su trabao. “Mi trabao ta pa bringa pa e derecho di mi mes y mi coleganan.Pa nan haña nan derecho – pa nan haya nan pago – te cu e bancarota final. Esaki ta pa nan haya locual Joseline Croes a primiti y garantisa den tur su declaracionnan oficial y entrevistanan.” Segun sra. Ramos, e empleadonan a perde nan pensioen, placa di vacantie, rutina diario y un famia. Nan no a haya ningun pago pa tur e añanan di servicio. “Ta facil pa bisa busca un otro trabao, pero kico ta bay pasa cu Aruba si esaki ta wordo accepta?” A pesar cu e por ta un caminda largo, caro y dificil pa e empleadonan, lo haci e maximo esfuerso hunto cu abogado Dello Gomez y Brian Coffe pa e compania y Joseline Croes cumpli cu nan obligacionnan segun sra. Ramos.
Bon Dia Aruba lo keda pendiente cu e desaroyo di esaki.
