Di dos edicion di Earth Day Forum a tuma luga ayera mainta na Hilton Hotel caminda e tema di e aña aki tabata “Climate Resilience” y a wordo organisa pa Ministerio di Transporte, Integridad, Naturalesa y Asuntonan di Adulto Mayor unda varios grupo di interes a presenta pa tene discusion pa loke ta trata cambio climatico.

Aña pasa, manera minister Ursell Arends a splica nan a celebra e dia aki riba dia di “Derecho di Naturalesa” unda nan a presenta e concepto di ley e mesun dia ey y e aña aki nan a presenta National Climate Resilience Council e cual ta e plataforma cu ta bay atende con Aruba mester prepara pa loke ta trata cambio climatico tanto pa termino corto como den termino largo y esey ta loke a presenta ayera.

Igualmente a informa cu su ministerio conhuntamente cu esun di Comunicacion, Asuntonan Economico y Desaroyo Sostenibel di Geoffrey Wever y 13 partner den comunidad ta financia un studio conduci pa un instituto Mericano e cual ta bay conduci na un Climate and Ocean Risk Vulnerability Index Assessment (CORVI) e cual ta bay provee mas cu 100 indicador y tambe 3.000 data points riba con tin cu atende cu cambio climatico, “con Aruba tin cu prepara su mes y fuera di esey a anuncia un partnership cu International Panel on Deltas, Coastal Areas, and Islands (IPDC) un plataforma lansa door di minister di Infrastructura y Gestion di Awa di Hulanda, Mark Harber, den e ultimo conferencia di Cambio Climatico di Nacionnan Uni (COP) caminda Aruba ta e champion pa full e region den Caribe.” El a bisa.

Ademas a trece dilanti cu “nos a tuma un approach nacional cu esaki no ta solamente tarea di gobierno pero e ta un responsabilidad comparti, cu tanto sector priva pero tambe NGO’s, academia y sector publico cu ta uni hunto pa asina nos por atende cu e tema aki mirando cu e ta afecta cada un di nos, cu nos tur mester ta prepara pa wak con ta bay atende cu cambio climatico na nos isla,” minister Arends a sigura.

Tambe, el a señala cu diadomingo ultimo a caba e consulta di ley pa Derecho di Naturalesa y awor e tin cu cana su caminda unda nan mester bay traha riba e concepto final pa esaki por wordo manda pa Raad van Advies y despues e por yega na Parlamento di Aruba prome cu final di aña “esaki ta loke nos a logra for di aña pasa cu e prome edicion di Earth Day Forum pa aworaki, sigur un trayectoria di un aña pero esaki ta pa prome biaha cu nos ta bay haci cambio na nos Constitucion y mi ta kere ta na su luga pa involucra comunidad completo pa nan sa kico ta e contenido di e ley, pero tambe nan duna nan imput di kico nan kier mira den e ley,” el a finalisa.