Director di ProColombia sector Caribe, sr. Carlos Gonzalez hunto cu representantenan di cuater instituto specialisa di salud na Medellin a bin Aruba pa mantene y fortalece e relacion directo cu nan tin cu nos comunidad en general. Durante nan breve estadia nan a tuma contacto cu organisacionnan di nos sector di salud, entre otro cu AZV.
Sr. Gonzalez a laga sa cu ProColombia ta apoya e institucionnan nan iniciativanan. Na nivel di Colombia nan ta pusta cu e sector aki ta uno di taya mundial y cu nan ta canando riba un caminda di excelencia.
Salud y turismo
“Nos a logra esey!. Nos ta reconoci na nivel internacional. Colombia como destino di salud y particularmente Medellin, como parti di un red di institucionnan cu ta brinda e multiple disciplina riba servicio medico”, director di ProColombia den Caribe a bisa. Igualmente nan a promove Medellin como un destino no solo di salud sino turistico.
Medellin tin hopi atractivo turistico masha conoci pa gran parti di e turista Arubiano, el a laga sa. El a formula un invitacion habri pa tur esunnan interesa den Colombia Moda cu lo tuma luga entrante e luna aki. “E ciudad aki ta bisti su mes di moda ya cu Medellin ta un ciudad di haci compras pa excelencia”. Otro atractivo ta e Feria de Las Flores, y Alumbrado di Medellin tur luna di december. Tambe Medellin ta conoci pa su experiencia culinario. “Nos tin restaurant di taya internacional, tambe cu cuminda internacional cu un oferta gastronomico bastante innova”, segun sr. Gonzalez.
El a remarca cu Medellin ta bon conecta cu Aruba, ya cu compania aereo manera Insel Air cu ta realisa vuelo directo, mientras Avianca, Copa y ALAN ta bula pa medio di conexion aereo, y den varios frecuencia diario.
Sr. Gonzalez a bisa cu Medellin su poblacion conoci como “paisa” ta hendenan amabel y hospitalario.
Siguridad
Ana Maria Monero kende ta director di Comunicacion y Marketing di San Vicente Fundacion a reconoce cu Medellin a pasa den un historia basta complica varios aña pasa relaciona cu violencia, narcotrafico, pero awendia Medellin ta un ciudad cu a transforma su mes totalmente.
El a bisa cu mirando e nivel siguridad na Medellin e indice di violencia a baha substancialmente. “Nos no tin raporta incidente cu por a pasa cu algun pashent internacional”, el a bisa. El a agrega cu “e tema di siguridad na Medellin no mester ta un preocupacion pa e hendenan cu ta bishita e ciudad aki”.
P’esey e ta haya importante cu tur e institucion di salud cu a bin den e delegacion aki (Clinica Las Vegas, San Vicente Fundacion, Hospital Juan Pablo Tobon Uribe y Grupo Empresarial Las Americas) tin nan oficina special pa pashentnan internacional.
“P’esey no ta recomenda e luganan pa nan keda. E transporte ta un transporte safe. E pashentnan nos ta cuida nan y conseha nan riba e tema di maneho di divisa, sitionan unda nan por bay, restaurant…”, el a bisa.
E ta haya cu berdaderamente e punto central cu den nan caso ta e pashent internacional, “nan por sinti nan mes completamente trankil di bishita un ciudad manera Medellin”. E ciudad aki ta ricibi miles di turista henter aña y cu ta un ciudad unda ta wordo organisa frecuentemente evento internacional di tipo deportivo, economico, salud, reunion di comercio of negoshi grandi. Recientemente a tuma luga e Foro Economico Mundial cu a resulta uno exitoso.
Medellin a keda nombra como e ciudad mas innova di mundo pa nan sistema di transporte y tur e desaroyo di inclusion social rond di e ciudad aki.
“Mi ta kere cu e ciudad di Medellin a crea un ambiente safe pa e hendenan cu ta bishita Medellin”, el a bisa.
Nan oficina di pashentnan internacional ta percura pa nan ta cerca e miho hendenan.
Ademas Medellin a wordo selecta enter e cinco ciudadnan principal di mundo cu e hendenan ta pensa riba dje ora cu nan kier baha cu pensioen. Nan ta busca un luga safe, trankil y economicamente stabiel. Cu nan inversion den real estate lo ta uno garantisa, sistema financiero adecuado y bon sistema y servicio di salud.
