Tema di condicionnan laboral ta motibo di participacion; Sindicatonan di sector publico kier participacion directo den negociacion pa e landspakket

Sindicatonan SADA, SEPPA, SIMAR y SPA kier participacion activo den e negociacionnan cu Hulanda riba e landspakket. Esaki e Presidentenan di e sindicatonan ta bisa den un carta cu a manda ayera pa Prome Minister Evelyn Wever Croes. E carta tabata firma pa presidente di SIMAR, Josephine Albertus, na nomber di tur e sindicatonan menciona.

E sindicatonan ta pidi enfaticamente pa Gobierno duna nan participacion y intervencion, ora cu cuminza cu e negociacionnan cu Hulanda. Mirando cu ta menciona temanan den e agenda cu den e sentido formal tin di haci cu e posicion huridico di ambtenaarnan y esunnan den funcion igual, “nos tin interes pa ta un participante activo den e negociacionnan. Esaki na beneficio di e meta principal di nos cu ta representa interes di nos miembronan y e categorianan cu ta cay bou di e sindicatonan,” e Presidentenan a bisa.

Den e carta ta referi explicitamente na capitulo IX, cu ta trata suspension y retiro como tambe capitulo X, cu ta e consulta organisa (georganiseerd overleg) di e Landsverordening Materieelrecht Ambtenaren, LMA.

Manera ta conoci, Hulanda y Aruba a bay de acuerdo cu ta reforma aparato publico pa asina hisa efectividad di e sector pa medio di reduci e peso financiero total di e aparato na nivel di e promedio den Caribe, cu ta 10 porciento di e Producto Interno Bruto y reduccion di costo di sector publico den sentido general. Ademas e meta ta pa hisa calidad y efectividad, incluso poder di implementacion di e sector.

Den e siguiente lunanan lo investiga a condicionnan laboral primario, secundario y tercero, entre otro e pago di overtime, areglo di vakantie y otro dianan liber, bonus special y ‘toeslagen,’ como tambe biahamento y pago di dia ora di biaha. Lo introduci proposicionnan pa reduccion di gasto pa tur e aspectonan aki y nan lo keda implementa tambe. E raportahe di investigacion lo ta cla pa 1 di October. Lo haci investigacion comparativo na e leynan pa loke ta e salarionan mas halto na Corsou, St. Maarten y Aruba, unda lo analisa entre otro e elementonan basico, e expansion, e parti di pensioen y e periodo di transicion. E investigacion mes lo mester keda entrega pa fin di e periodo aki, esta na October pero e siguiente pasonan ta pasa pa e siguiente agenda di ehecucion.

Tambe lo investiga e formacion, ocupacion y presencia real y empleabilidad di tur trahado di Gobierno y organisacionnan publico, den cuadro di un esfuerso optimal di e personal,Si e trahadonan ta ricibi salario di forma inhusto, lo tuma medida dependiente e situacion of lo por tuma medida, manera para salario of pasa pa retiro. Parti di e proceso aki ta investigacion di e cuadro huridico y adaptacion di e LMA y otro articulonan cu mester ta cla pa yuda den e fluho di trahadonan publico. E fecha cu esaki mester ta cla pa ehecuta ta 15 di December 2021, y ta den man di Hulanda y Aruba.

Segun e presidentenan sindical, no ta necesario mes pa menciona cu como sindicato nan ta pone hopi balor na temanan cu ta mishi e condicionnan di trabou primario, secundario y tercero. Tambe ta di interes esencial cu e sindicatonan ta ricibi informacion corecto y debido na tempo, y no keda confronta despues di e hecho cu a tuma decisionnan cu por trece un impacto negativo. E sindicatonan ta termina e carta cu e speransa di por tende mas pronto posibel di Prome Minister Evelyn Wever Croes.