‘Explosion termonuclear fugitivo, titanico’. ‘Un acto di desaparicion’. ‘Bom atomico di naturalesa’. Asina NASA a describi un supernova, e momentonan final di existencia di un strea.
Setenta miyon di aña luz leu, den e galaxia spiraal NGC 2525, un white dwarf a explota y e Telescop Espacial Hubble a presencia su ultimo dianan. NASA y Agencia Espacial Europeo (ESA), cu ta maneha Hubble conhuntamente, a revela un time-lapse inusual di con e supernova su luz ta dim.
E telescop espacial a cuminsa observa e supernova, yama SN 2018gv, na februari 2018. E time-lapse ta cubri casi henter un aña di observacion di Hubble.
E supernova incialmente tabata briya mas cu otro streanan den su galaxia anfitrion. “Ora un strea ta libera mesun hopi energia den algun dia cu loke nos Solo ta libera den varios biyon di aña, bo sa cu e no ta bay keda visibel pa largo”, NASA a bisa den un declaracion.
Hubble a observa e supernova mientras cientificonan tabata traha pa compronde miho e ritmo di expansion di e universo. “Mas cu djis duna show di luz celestial, supernovae por ser usa como marcanan di posicion pa midi distancia entre galaxianan”, NASA a bisa. “E pijlchi aki ta necesario pa calcula con rapidamente galaxianan ta parce di ta alehando di otro, cual na su bes ta duna un calculacion di edad di e universo.”
Mientras cu supernovae ta relativamente comun den henter universo, e time-lapse di Hubble ta duna nos un bista poco comun riba e proceso dramatico hunto cu un recordatorio cu hasta streanan no ta permanente.
