Diahuebs ultimo, Telefon pa Hubentud a ofrece un conferencia di prensa pa medionan local, pa informa tocante e ‘Unicef Kinderrechten Filmfestival’ cu lo tuma lugar na Boneiro di 12 pa 14 di juni di e aña aki.

Director di Fundacion Telefon pa Hubentud James Sneek a duna di conoce cu na momento cu un mucha ta ricibi informacion tocante derecho di mucha esaki ta pa e siña cu tin derecho pero tambe e ta siña cu otro persona tin derecho. E mester siña respeta otro su derecho tambe y loke ta mas importante ainda ta cu e mucha ta siña cu e por para pa su mes na momento cu un persona tin mal intencion of ta purba di haci algo malo cune.

Sneek a splica cu esaki ta di dos biaha cu e fundacion ta organisa e ‘Unicef Kinderrechten Filmfestival’ , e prome biaha tabata na 2018, unda nan a acerca Unicef Hulanda pa asina organisa e festival. Mirando cu e prome biaha nan a haya un bon resultado, ta opta pa ripiti e aña aki.

Tambe e ta bisa cu e obhetivo di e organisacion di e festival aki ta pa mucha por siña mas tocante nan derecho y pa nan por defende nan derecho, na manera decente, manera mester ta.

Kinderrechten Filmfestival tin diferente fase, Sneek a menciona cu por ehemplo tabatin un training cu a tuma lugar cu diferente docente, esaki a tuma lugar 1 di februari ultimo na Universidad di Aruba y a ser duna pa Tamara Salsbach, kende ta e persona cu ta duna training pa Unicef Hulanda den Caribe Hulandes.

Segun su splicacion tin varios scol cu ta participante na e festival aki, tambe pasobra pa nan futuro e muchanan por siña tocante nan derecho y ricibi informacion di esey. Tambe ta traha cu duna e muchanan e opcion di pone nan experiencia den un pintura, y despues di esey lo organisa un exposicion na scol. E ganado di cada klas lo competi pa dicidi ganado di scol y despues mester traha un film y asina nan lo ta competiendo den un film festival cu lo tuma lugar na Aruba primeramente y despues na Boneiro, cu ta e parti final.

Di su parti, Shurman Milliard trahado social di e fundacion a trece dilanti cu nan ta haya importante cu ta scucha e derechonan di mucha na Aruba; tambe cu Unicef Hulanda a scoge pa laga e otro islanan di Caribe participa.

Den mesun linea el a destaca cu Aruba tin un rol hopi grandi,Telefon pa Hubentud ta e unico fundacion cu pa di dos biaha mag participa den e parti organisatorio di e festival.

Telefon pa Hubentud a participa na un nivel special pa motibo cu e derechonan di mucha nunca a wordo skirbi na idioma Papiamento. Ta p’esey cu nan a laga Unicef Hulanda sa cu Aruba tambe kier su propio buki riba derechonan di mucha na Papiamento. El a expresa di ta orguyoso di haya esey y cu Aruba tambe ta participa na su mesun idioma den e tema di derecho di mucha.

Di loke ta trata e festival, tur mucha di e cinco scolnan tin cu traha cinco diferente film, ora nan ta haya e filmnan nan lo laga comunidad mira kico e muchanan a haci y den cual direccion nan ta bayendo. E ganado lo bay Boneiro pa competi cu e otro islanan di Reino Hulandes.

Ademas, Milliard a manifesta cu nan lo kier traha un film cu tur e muchanan cu ta participa. Tambe el a declara cu nan a haya un bon sponsor, cu ta Caribbean Cinemas, tur e mucha cu ta participante tin cu asisti na e lugar aki. Tambe el a duna di conoce cu nan tin diferente scol di diferente districto y di diferente klas manera klas 4,5 y 6 di scol basico como tambe di scol special.

“E parti bunita di e proyecto aki ta cu ta tuma tur scol di Aruba, di San Nicolas te na Noord; tur ta haya chens pa wak kico nan ta pensa encuanto nan derechonan, kico nan ta wak como inkietud den nan bario, den nan famia, esey ta e parti bunita,” director James Sneek a declara.

Pa finalisa, nan a comenta cu e ‘filmcoachnan’ cu lo ta participando na e Unicef Kinderrechten Filmfestival 2020 ta: Juan David Villar Steffens, Juan Francisco Pardo, Armando Goedgedrag, Efraim Odor y Paula Nahr.