Ayera mainta durante un conferencia prensa Fundacion Telefon pa Hubentud Aruba a elabora ariba diferente topico di importancia pa e organisacion relaciona cu celebracion di Dia Internacional di Derecho di Mucha dia 20 di november proximo y tambe a elabora ariba e bishita cu e fundacion a ricibi for di Prinses Beatrix diahuebs ultimo.
Na prome luga, director di Fundacion Telefon pa Hubentud Aruba, James Sneek, a elabora ariba e bishita di Prinses Beatrix cu e organisacion a ricibi diahuebs 9 di november. “Un bishita hopi importante pa nos organisacion pero for di dje tambe nos por a mira cu e tabata asina agradecido pa ricibi informacion di kico tur nos organisacion ta haciendo aki na Aruba pero tambe na e islanan di Boneiro, Sint Eustatius y tambe Saba,” Sneek a remarca.
El a splica cu Prinses Beatrix a haya informacion di diferente proyecto cu Fundacion Telefon pa Hubentud Aruba ta implementando aki na Aruba, pero tambe riba e otro islanan ya caba menciona. Proyectonan mas cu clato pa mucha y hoben, pero tambe diferente training cu organisacion ta dunando y a cuminsa cune a traves di nan centro e aña aki pa e profesionalnan.
Sneek a sigui splica cu despues di a ricibi tur e informacion aki, Prinses Beatrix a ricibi tambe informacion tocante e ayudo cu ta tuma luga a traves di telefon y chat. “Aki e la a keda hopi asombra no solamente con e servicio ta wordo duna, pero tambe e trabao cu nos mentornan ta haci. E tabata hopi interesa tambe pa sa kico tur ta pasando bao di nos mucha y hobennan,” el a indica.
E director di e fundacion a remarca cu como Telefon pa Hubentud, di mesun manera cu e famia cu ta den combersacion tur dia cu e mucha y e hoben y di mesun manera cu e docente tambe ta den combersacion tur dia cu e muhca y hoben, Fundacion Telefon pa Hubentud tambe ta tur dia den combersacion cu e mucha y e hoben y esaki, el a resalta, ta duna nan un bista di kico tur ta pasando bao di e mucha- y hobennan na Aruba.
Pa finalisa e bishita, Fundacion Telefon pa Hubentud tabatin e honor di laga Prinses Beatrix revela e logo nobo cu ta e logo cu ta bay representa e organisacion den e proximo 25 añanan.
Pa e logo nobo, Sneek a splica, aña pasa nan a haci un competencia di pintamento bao di mucha- y hobennan di ocho scol basico y cinco scol voortgezet onderwijs. E fundacion a saca prome ganador di cada scol y despues di esey a saca un ganador di e scolnan basico y un ganador di e scolnan di voortgezet ondwerwijs y na final a saca un ganador absoluto di e logo.
El a sigui splica cu nan tabata buscando un logo cu por representa tur e servicionan cu e fundacion ta ofrece cual no ta solamente telefon mas. El a indica cu nan ta miembro di Child Helpline International y aworaki nan tin servicio di telefon, email y chat, pero tambe e mucha cu e hoben despues di 6or por subi riba e organisacion su website y ricibi informacion preventivo cu e por ricibi via telefon, email of chat. Banda di esey Telefon pa Hubentud ta den tur scol na Aruba cu lezing, tayer y proyecto.
“Asina ki nos ta purba di brinda un ayudo 24 ora pa dia. Esaki ta tur e servicio cu nos ta brinda y nos tabata buscando un logo cu por representa esaki,” el a señala.
El a agrega cu e logo nobo ta un logo cu ta representa e mucha, e hoben, y hende homber y hende muhe. E tin un outline blauw cu pa e organisacion ta significa e derechonan di mucha y tur e servicionan cu nan ta duna pa salvaguardia y zorg pa e mucha- y hobennan aki na Aruba, y na e islanan BES ,ta sigur pa nan por desaroya nan talento y nan habilidadnan y ta e personanan cu nan kier ta mañan den comunidad di Aruba, pero tambe internacionalmente.
“Nos ta bezig cu diferente instrumento sostenibel, preparando e organisacion pa e siguiente 25 añanan y e logo tabata un di e instrumentonan cu mester a bin un cambio na dje pa asina nos por ta cla pa e siguiente 25 añanan y asina tambe el a ser revela dia 9 di november ultimo,” el a señala.
Shurman Milliard, trahado social na Fundacion Telefon pa Hubentud Aruba, a remarca cu nan ta contento cu cada aña dia 20 di november e fundacion y Aruba ta celebra derecho di mucha, pero banda di esey e fundacion ta celebra tambe cu ariba e dia aki Telefon pa Hubentud a ricibi su prome yamada di hoben na Aruba.
El a subraya cu Telefon pa Hubentud como fundacion cu tey pa e mucha- y hobennan, no solamente pa esnan mas chikito of adolescente, pero pa tur e hobennan y comunidad, kier celebra e dia special aki den grandi tur aña.
El a splica cu pa e aña aki ariba dialuna 20 di november Telefon pa Hubentud ta bay take over e programa matutino local, Nos Mainta y riba e dia ey e organisacion ta bay ta encarga cu e invitadonan den e programa y e diferente topiconan cu ta bay bin dilanti y mas cu claro derechonan di mucha ta bira topico di prioridad e dia aki.
Milliard a indica cu pa e aña aki e tema pa celebracion di Dia Internacional di Derecho di Mucha ta ‘children in times of need’ (muchanan den temponan di necesidad). El a remarca cu na Aruba y otro paisnan rond mundo muchanan ta pasa den cosnan duro y esaki ta algo cu mester subraya. “No ta e muchanan di Aruba so tin derecho pero tur caminda mucha tin mesun derecho y esey nos kier pa comunidad sa y tambe e hobennan di Aruba y otro camindanan na mundo tambe,” el a señala.
El a agrega cu e tema aki naturalmente tin di haber cu guera, tin di haber cu momentonan hopi duro pa e comunidad di Aruba y comunidadnan afo y como fundacion nan kier enfatisa cu e muchanan ta e futuro di mañan. “Na e momento cu nan sa esey y nos ta duna nan e poder ey, nan por briya y laga e cosnan cu ta bay menos bon den nos comunidad of comunidadnan mundialmente mehora,” el a resalta.
