E plataforma di internet a wordo yama na honor di un filosofo populista Frances, y crea pa un entrepreneur Italiano, pa transforma kehonan comun den propuestanan, y activistanan den candidatonan politico.
Ora vice prome minister Italiano a ofrece e plataforma Rousseau, di e populista 5-Star Movement na e jacketnan geel Frances, el a bay mucho leu pa presidente Frances, Emmanuel Macron. E lider Frances a yama bek e embahador na Italia pa un siman den e disputa diplomatico mas skerpi entre e dos aliadonan desde Segundo Guera Mundial.
E acto di comparti tecnologia Rousseau ta marca e intento mas descarado pa internacionalista movementonan populista Europeo. E ta un presagio di e eleccionnan parlamentario Europeo na mei proximo, den cual ‘euroskepticonan’ populista por gana un di forma sin precedence un tercio di e asientonan, bou pronosticonan actual. Esaki lo por causa collapse di e grupo principal, cual te awo tin e bloc di votado mas grandi den parlamento.
Sinembargo, eleccionnan Europeo tambe lo ta un test pa con leu partidonan populista, cu tambe usualmente ta virulentamente nacionalista, por uni a traves di fronteranan y di e spectro politico. Na Italia so, e dos partido populista den gobierno, e 5-Star Movement y e League, ta competi mesun hopi cu nan ta coopera.
Na e nivel mas basico, populistanan tanto iskierdista como derechista ta pone hende comun bringa e elite, e clase politico.
Tecnologia a yuda nan avansa. E 5-Star Movement a uza e portal Rousseau pa permiti activistanan scoge candidatonan y politicanan, hopi similar na e partido Spaño, Podemos, a uza Reddit pa energisa debate online cuminsando cinco aña pasa, y ainda ta uza referendum online. E protestantenan di jacket geel na Francia ainda no tin un espacio comun online, mientras nan ta prolifera riba gruponan di Facebook y canalnan di YouTube.
Si ideologia y organisacion por mas cu geografia, partidonan populista na Europa lo por forma un bloc capaz di debilita of hasta paralisa legislatura Europeo, si proyeccionnan revela e siman aki pa parlamento ta mantene.
“Nos mester rechasa e financieronan cu ta mira nan mes como semi diosnan. Rechasa e burocratanan na Brussels representando nan interesnan, y rechasa e activistanan falso di sociedad civil”, presidente Hungaro, Viktor Orban, a bisa den su discurso di estado di e nacion e luna aki.
Diabierna, lider di 5-Star, Luigi di Maio a anuncia un grupo nobo di movementonan populista Europeo, treciendo hunto un partido Polaco ultraderechista lidera pa un musico di rock, y un partido di liber comercio Finlandes, funda pa un comerciante y strea di television. Por a nota e ausencia di e nacionalistanan, habriendo e pregunta di cuanto influencia e aliansa nobo lo por tin sin expande mas.
Maske e movemento populista Italiano ta fragmenta, entre e jacketnan geel, conoci na Francia como ‘gilet jaunes’, ultraderecha y ultraiskierda a marcha hunto cu speransa di baha gobierno.
“Esaki ta e beyesa di dje: Nan ta tanto e iskierda como e derecha. Ta un cos populista”, stratega politico Steve Bannon a bisa poco despues cu Macron a yama bek e embahador.
Eleccionnan di parlamento Europeo en realidad ta un serie di cuater dia di eleccionnan nacional, teni entre dia 23-26 di mey na Europa, y ta dicidi legislacion. Miembronan ta haci ley Europeo, dicidi acuerdonan internacional, y – crucialmente – por censura paisnan di Union Europeo cu ta viola balornan, manera un poder hudicial independiente y cumpli cu derechonan di minorianan y migrantenan.
