(NLTimes)—Ta conoci cu e medicamento antidepresivo mas uza, sertraline, miho conoci bao di e marca Zoloft, ta traha bon pa algun, pero pa otro e no ta traha mes. Den un algoritmo di inteligencia artificial (IA) desaroya pa investigadonan na Amsterdam UMC y Radboudumc na Nijmegen por yuda dokternan determina despues di un siman si un pashent ta sensitivo pa e medicamento, en bes di e seis pa ocho siman tipico di prueba y eror, e hospitalnan universitario a anuncia.

E algoritmo ta pronostica si e antidepresivo lo traha a base di un scan celebral y e informacion clinico di e individual. E investigadonan a test nan algoritmo por medio di mira si nan por pronostica e efecto di sertraline den un estudio previo conduci na Merca.

Den e estudio ey, 229 pashent cu depresion severo a haya scannan di MRI y a graba nan data clinico prome y despues di un siman di tratamento cu sertraline of un placebo. E algoritmo di e investigadonan Hulandes por pronostica cu sertraline lo traha pa solamente un tercer di e pashentnan den e estudio ey.

“E algoritmo a sugeri cu esnan cu tabata hopi circulacion di sanger den e corteza cingulada anterior, e area di e celebro envolvi den regulacion di emocion, lo ser yuda pa e medicamento,” segun Eric Ruhé, un psikiatra na Radboudumc. Esey tabata e caso durante e segundo medida, un siman despues cu e pashentnan a cuminsa tuma e antidepresivo, basa riba e severidad di nan sintoma.

Sertraline ta un di e antidepresivo mas comun cu ta ser prescribi na Europa y Merca. Na Hulanda, aproximadamente 126,000 hende ta tum’e. “Cu e metodo aki, nos por preveni caba dos tercer di e cantidad di prescripcionnan “eroneo” di sertraline y asina ofrece miho calidad di cuido pa e pashent,” segun Liesbeth Reneman, profesor di neuroradiologia na Amsterdam UMC.

E investigadonan ta spera cu nan metodo por yuda modifica tratamento di sertraline pa e pashent individual. “Actualmente, no tin un ciencia precisa. E pashent ta haya e medicamento, y despues di seis pa ocho siman—den practica, frecuentemente te cu seis luna—ta check si e medicamento ta trahando. Si e sintomanan no reduci, ta duna e pashent un otro antidepresivo, y e proceso aki por ripiti su mes varios biaha,” Amsterdam UMC a bisa.

Tur ora, e pashent ta sigui sufri cu sintomanan di depresion, combina cu e efectonan for di antidepresivonan, cual por inclui nausea, biramento di cabes, insomnia y disfunccion sexual, entre otro.

E resultadonan di e estudio ta publica den e revista American Journal of Psychiatry. E investigadonan ta spera cu nan metodo por eventualmente yuda test e efectividad di otro antidepresivo tambe.