Tecla Hernandez-Kelly: “Eigenlijk SMAC no mester a lanta, SMAC por a keda su cas trankil”

Den un entrevista cu presidente di SAC (Stichting Arubaanse Carnaval), Sra. Tecla Hernandez-Kelly ta conta Bon Dia Aruba di su trayectoria como miembro y presidente di SAC, su punto di bista a riba e cambionan relaciona cu carnaval y den ki direccion e ta mira carnaval ta bay den futuro.

Tecla a cuminsa su trabao como boluntario den e fundacion di SAC cu un edad hopi jong, cu su 22 aña el a cuminsa yuda como boluntario y tabata yuda busca candidata pa reina di districto di Oranjestad. 

E tabata traha hopi den e parti di carnaval hubenil te cu mas o menos añanan 80. Den e añanan aki el a haya e oportunidad pa drenta den e grupo cu ta organisa e paradanan grandi, algo cu e tabata desea pasobra den e grupo aki e por vocifera su opinion y ideanan mas fuerte.

El a conta na prome instante el a cuminsa como assistent di defunto Milo Croes, ex-presidente di SAC. Na aña 2003 Sr. Croes a retira como presidente di SAC y durante un eleccion pa presidente Tecla a gana y a cuminsa su rol como presidente di e fundacion organisando carnaval.

El a remarca cu a pesar cu SMAC ta e organisacion cu ta encarga cu carnaval aworaki, SAC t’ey ainda. El a indica cu ya caba un biaha nan a pidi pa SAC bolbe organisa carnaval, pero e minister encarga e tempo ey, a nenga nan peticion.

Na 2014 SAC a bringa pa sigui cu nan tarea, pero na final a destitui SAC como e fundacion organisador di Carnaval y asina SMAC a lanta y a asumi e rol aki.

“Ami a sigui di 2003 te cu 2014, mi a keda fungi como e president di SAC y na modo di papia te cu awe, y tanten cu SAC t’ey mi t’ey y si mi tin cu bay, mi tin cu bay pasobra ami tampoco no ta keda pa semper,” Tecla a resalta.

E cambio di SAC pa SMAC, el a splica, a bin pasobra hopi tabatin e pensamento cu SAC tabatin hopi placa, pero e realidad tabata cu SAC no tabatin placa. E placa cu SAC tabata ricibi, el a sigui splica, tabata di sponsor y e placa ey tabata wordo inverti back den carnaval.

El a conta cu tempo nan aya, compara cu aworaki e tabata mas dificil pa haya regalo y donacionnan for di comerciante- y entidadnan pa duna como premio na ganadornan di eventonan di carnaval.

Pero na mesun momento el a enfatisa cu e ta contento si di mira cu aworaki comerciantenan ta mas habri pa participa y yuda den carnaval cu nan aporte, sea ta financiero of di otro forma.

Calypso y Roadmarch Contest

Bao SAC Aruba tabata conoce Calypso y Roadmarch contest, un di e eventonan mas gusta y popular di temporada di Carnaval.

Tecla a conta cu na 2014, difunto musico Antoni Gario a cuminsa pone presion cu mester cambia e Calypso y Roadmarch pa Soca. Un cambio cu Tecla no tabata di acuerdo cune, pasobra Soca no tabata algo di Aruba.

“Mi tabata purba splic’e cu Aruba no ta un isla di Soca, pero Aruba ta un isla cu a traha su mesun cantica. Nan ta bisa Roadmarch no ta un genre, pero ken a bisa cu nos ta bay riba genre, e no a bay riba genre, el a bay pasobra Aruba mester un cantica y nos a pone yama Roadmarch pa asina hende por cana cune riba caminda,” el a splica.

El a agrega cu como presidente cu hopi aña di experiencia organisando carnaval el a adverti esnan cu tabata pidi pa e cambio aki cu dia nan pone Soca, e canticanan ta muri.

“Mi a bisa nan boso ta mata nan. Mi no tin nada contra niun cantica, pero e canticanan cu nos ta yama Roadmarch di tur e añanan bo ta wak cu ora un Roadmarch sali e ta pa tur hende. E ta un cantica cu no tin hopi palabra dificil y ta bin cu su baile,” el a indica.

Aworaki, lamentablemente e evento aki no ta mesun popular cu añanan anterior, tempo di SAC, y e cambio tan spera ey “a sigui daña cos”

“A bin Caiso cu Soca. Morto. Esey bo kier esey bo ta haya, loke bo wak ta loke bo ta haya. Aruba a mustra caba cu e no kier esey. Nos tempo di SAC nos tabatin Joe Laveist Ballpark rand rand. Bo mester sa kico e pueblo kier. Esey ta loke Aruba ta gusta,” el a remarca.

Cambio

Cambio ta inevitable berdad. Tecla ta conta cu tempo di defunto Sr. Milo Croes, reinanan semper tabata bisti na blanco cu handschoen largo y tabata cana pa competi pa e corona di reina di carnaval. Algo cu a keda asina pa hopi aña, te ora cu un persona a bin cu algo diferente y tur a sigui e cambio aki.

Asina poco poco e cambionan tabata bin aden, y a pesar cu tin cambionan cu tabata pa bon, algun no. Tecla a splica cu mientras cu nada malo no tabata pasa, e tabata bon, pero asina algo pasa, mester a pone stop na cierto cosnan y trece cambio atrobe cu e meta pa mehora y engrandece carnaval.

Pa loke ta futuro, unda Tecla ta mira carnaval, el a enfatisa cu for di su punto di bista e ta kere u nan tin cu traha duro riba dje si Aruba kier sigui celebra carnaval.

El a splica cu tempo cu e por a keda, e pueblo no a sostene y aworaki tin tanto cos ta pasa cu ta pone un nubia negativo ariba celebracion di carnaval.

“Tur cos tabata hinca den otro y e tabata lora. E aña ki wak cuanto cos a pasa, hopi cos. Maske e president actual, mi sa y mi a wak e ta purba haci su best, el a purba, pero asina mes bo ta haya bo den cos. Nan tabata bisa cu ora SAC bay pleitamento ta caba, pleitamento no ta caba nunca,” el a bisa.

Por ultimo, Tecla ta indica cu un problema cu tin aworaki ta cu un president no ta keda largo. Tempo di SAC tabatin critica pasobra e fundacion tabatin e mesun president pa hopi aña, pero dos aña no ta suficiente.

“E carnaval di e aña aki ta e ultimo pa e presidente cu tin aworaki, otro aña ta bay tin otro cu tin cu cuminsa full di nobo, trece cambio pa daña cos of drecha cos. Mi no sa. Mi wak e presidentnan cu a bay, niun a haci nada drechi. Niun di e cuaternan cu a bin despues di mi,” el a remarca.