E team cu actualmente ta trahando riba e version final di Plan Maestro Boneiro 2030 a dicidi pa pospone e presentacion un tiki mas ainda.
“ E limitacionnan den e tempo di corona aki a stroba nos mas tanto cu nos por a pensa ora nos a anuncia cu nos ta bay lansa e Plan Maestro dia 6 di november. Nos a constata cu como consecuencia di obligatoriamente cancela cierto sesionnan, no a profundisa suficientemente den algun topico di manera cu ta dificil pa haci e totalidad integral comprendibel. Nos tin cu mira como un puzzel grandi di centenares di pida chikito. Ta te ora cu bo ta cerca cla bo ta descubri si ainda falta algun pida. Na e momentonan aki e plan no ta suficientemente ‘hecho’ ainda pa presenta na pueblo ”, segun e team di Plan Maestro.
A tuma e decision pa posponemento despues di consulta cu Colegio Ehecutivo, autor di e plan y ministerio di Asuntonan Interno y Relacionnan den Reino. “ Tur hende ta di acuerdo cu calidad ta prome cu rapidez. E Plan Maestro mester ta suficientemente bon pa bay 10 aña largo cune, pues ora nos presenta e version final nos ke pa nos por para 100% su tras.” Asina cu tin mas claridad tocante esey, nos lo anuncia un fecha nobo.
