Ayera tabata e delaster dia di trabou di Otmar Oduber den sector publico, despues di 22 aña den politica, caminda el a fungi 8 aña como parlamentario y casi 10 como minister.
Durante un conferencia di prensa extraordinario, Prome Minister, Evelyn Wever-Croes a anuncia cu e lo tuma over temporalmente e responsabilidad ministerial cu Otmar Oduber tabatin den su gabinete.
Premier Wever-Croes a bisa cu e lo tuma over e cartera di Infrastructura, Desaroyo Teritorial y Medio Ambiente, temporalmente. El a indica cu practicamente e lo ta na encargo di e carteranan adicional aki pa e ‘siguiente oranan’.
E lo keda na encargo te ora cu nan lo por finalisa cu tur e cambio den nos organo legislativo, ora cu Marisol Lopez-Tromp ta bandona Parlamento pa asumi su responsabilidad como minister. Te aworaki e proximo minister ta na Hulanda, atendiendo un congreso den cuadro di e 65 aña di Statuut Koninkrijk. Pero unabes cu Lopez-Tromp bin bek, e lo huramenta pa asumi su funcion nobo.
Wever-Croes a sigura cu tur e cambio aki lo tuma luga prome cu reces. Bon Dia Aruba por haya informacion cu unabes e parlamentario asumi su funcion como minister, lo sigui traha cu e mesun team cu a compaña ex minister Oduber durante e ultimo dos aña di e gobernacion aki. Pues den esaki no lo tin cambio.
