Unabes cu Gonzalo a yega su fin ayera mainta, tur departamentonan envolvi den e team di calamidad por a hala rosea. Ayera 1or di media Rampen Bureau a informa nan cu no tabatin mester mas pa nan keda standby. Pero si Aruba a sigui haya efectonan di Gonzalo den forma di yobida, pero nan no tabata nifica niun daño infrastructural cu ta exigi asistencia.

Segun director di Rampen Bureau, Rino Hermans, nan tur tabata na expectativa di loke Gonzalo lo por trece pa nos isla. E departamentonan envolvi pa atende cualkier calamidad tabata cla pa cualkier eventualidad. Pero ayera banda di 11or di mainta e modelo atmosferico a mustra cu ya no tabatin necesidad pa sigui mantene e servicionan di gobierno ariba standby.

Presencia di Gonzalo den forma di horcan a wordo pronostica awe den un distancia prudente for di nos costa noord. Pero awor cu e fenomeno aki a disparce, Aruba por spera den e dianan aki algo di awasero. Pero e ta algo cu Aruba por maneha di yobida sin problema, segun Hermans.

Mirando cu nos ta cuminsa sinti un temporada di horcan intensivo 2020, ya cu nombernan manera Gonzalo y Hanna cu supuestamente, y segun pronostico, ta nombernan cu nos mester conoce nan na october, pero ya den juli nos a conoce nan caba. Hermans a agrega cu e parti mas intensivo pa e region Caribense, principalmente pa islanan ABC, lo sigui y ya caba nos conoce e menasa di Gonzalo.

Pero e temporada nos dilanti comunidad mester keda pendiente, ya cu e surgimento di fenomeno asina ta bira e patronchi pa luna di october. Esta cu sistemanan ta bay keda menasa e parti sur di Caribe. “Gonzalo no a molestia nos mucho, pero esunnan cu ta sigui, nos ta spera cu no molestia nos mucho,” el a declara. Podise nan por manifesta nan mes cu tiki di awasero, pero no daño infrastructural.

Ayera so cu un turbulencia di nubia cu a produci 27 millimeter di awa cu a ocasiona cu un par di mata di kwihi a cay. Pero un rato despues, personal di DOW a actua pa piki nan. El a laga sa cu nan tin un plan basta intensivo den otro pa actua di forma preventivo, prome cu algo lo por sosode.

Ayera Bon Dia Aruba a haci un recorido den sitionan manera rooi Manonchi y na Madiki, unda problema cu awa semper ta wordo presenta. E area di e rooi tabata mustra limpi y tambe e gulido di Madiki cu tabatin gewoon cierto nivel normal di awa den dje. Hermans a indica cu nan tin nan plan.

For di diasabra caba full instancia a wordo alerta. Nan a mobilisa den tres seccion na Aruba a base di nan debilidad ora cu basta awa ta cay. Tambe Hermans a indica cu nos tin capacidad suficiente na Aruba pa atende cu cualkier eventualidad.